گۆڕێكی بەكۆمەڵ لە حەویجە دەدۆزرێتەوە و گومان دەكرێت پێشمەرگە بن

ئاڤا نیوز

دۆزینەوەی گۆڕێكی بە كۆمەڵ لە سنووری شارۆچكەی حەویجەی سەر بە پارێزگای كەركووك ئاشكرا دەكرێت و گومان دەكرێت ڕووفاتی ئەو پێشمەرگانەی تێدا بێت كە بەدیلی كەوتنە دەست چەكدارانی داعش و شەهید كران.

وێنە گەورەكە: ژمارەیەكی بەرچاو لەو پێشمەرگانەی كە شەڕ و ڕووبەڕووبوونەوەی ڕێكخراوی تیرۆریستیی داعش لە ساڵانی 2014 و 2015 بەدیل گیران، لەلایەن ڕێکخراوەكەوە بردران بۆ قەزای حەویجە، بۆیە گومان دەكرێت هەر لە سنووری ئەو قەزایەش شەهید كرابن و لە گۆڕی بە كۆمەڵدا ژێرخاك خرابن.

لێدوانی فەرمی: د. یاسەمین مونزر، بەڕێوەبەری بەشی گۆڕە بەکۆمەڵەکان لە پزیشکی دادی عێراق بە دەروون مەلا ناجی پەیامنێری ئاڤا میدیای لە بەغدا ڕاگەیاند: لە قەزای حەویجەی سەر بە پارێزگای کەرکووک گۆڕێکی بە کۆمەڵمان هەڵداوەتەوە 17 ڕووفاتی تیادایە و گومان دەکەین پێشمەرگە بن و بۆ ئەو مەبەستە بە هاوکاری حکومەتی هەرێمی کوردستان نموونەی پشكنینمان لە کەسوکارەکانیان لە پارێزگای هەولێر وەرگرتووە و بەراوردیان دەكەین بۆ ئەوەی ناسنامەكانیانمان بۆ ئاشكرا بێت.

ئەوەی پێویستە بیزانیت: لە ساڵی 2018 گۆڕێكی بەكۆمەڵ لە گەڕەكی پیشەسازیی قەزای حەویجە دۆزرایەوە و بەپێی ناسنامەكانیان دەركەوت كە سیانیان كوردن و پێشمەرگە بوونە و ئەوەی دیكەیان هاووڵاتییەكی بە نەتەوە عەرەب بوو، هەر چواریان لەلایەن چەكدارانی داعشەوە شەهید كرابوون و خرابوونە گۆڕێكی بە كۆمەڵەوە.

ئەمەش بزانە: لە 2015-01-30، تیرۆریستانی داعش هێرشێكی فراوانیان بۆ سەنگەرەكانی پێشمەرگە ئەنجامدا و شەڕ و پێكدادانی سەخت ڕووی دا، لە ئەنجامدا ژمارەیەك پێشمەرگە لەلایەن چەكدارانی ڕێكخراوە تیرۆریستییەوەكە بەدیل گیران و دواتر لەنێو قەفەز لەنێو بازاڕی قەزای حەویجە بە ئامادەبوونی دانیشتووانی قەزاكە نمایش كران و تۆماری ڤیدیۆییان بڵاو بووەوە، دوای ئەو تۆمارە ڤیدیۆییە ئەو ژمارە پێشمەرگەیە بێسەروشوێن بوون.

باكگراوند: شەڕی پێشمەرگە و تیرۆریستانی داعش لە ناوەڕاستی ساڵی 2014ـەوە دەستی پێكرد و تا كۆتایی ساڵی 2017 بەردەوام بوو، لە ئەنجامی شەڕەكەدا زیاتر لە 1500 پێشمەرگە شەهید بوون و نزیكەی 10 هەزار پێشمەرگەی دیكەش زامدار بوون، ئەمە جگە لە بێسەروشوێن بوونی دەیان پێشمەرگەی دیکە.