کریستیانەکان داوای دوورخستنەوەی گرووپە میلیشیاکان لە دەشتی نەینەوا دەکەن

 

ئاڤا نیوز

پێکهاتەکانی کریستیان لە پێناو دەستەبەرکردنی مافەکانیان، بە هاوبەشی چەند داواکارییەک ئاراستەی لایەنە پەیوەندیدارەکانی عێراق دەکەن.

یاداشتی فەرمی: پێکهاتەکانی کریستیان بە ناوی داواکارییەکانی پێکهاتەی مەسیحی، یاداشتێکیان ئاراستەی هەر یەک لە سەرۆکی پەرلەمانی عێراق، سەرۆکی دادگای فیدراڵی، سەرۆکی لیژنەی یاسایی پەرلەمان، سەرۆکی کوتلەکانی پەرلەمانی عێراق و سەرۆکی کۆمیسیۆنی باڵای هەڵبژاردنەکانیان کرد، بۆ ئەوەی گرووپە میلیشیاکان لە دەشتی نەینەوا دوور بخرێنەوە و ماددەی 140 جێبەجێ بکرێت.

لە لایەکی دیکەوە: پێکهاتەکان جەخت لە پاراستنی پێکەوە ژیانی کۆمەڵایەتیی و جێبەجێکردنی بنەماکانی دیموکراسی و ئازادیی ئاینیی لە عێراق دەکەنەوە، وەک ئەوەی لە دەستووری هەمیشەیی عێراق و ڕێککەوتن و پەیماننامە نێودەوڵەتییەکاندا هاتووە، کە عێراقیش ئەندامە لە ڕێکخراوی نەتەوە یەکگرتووەکان.

زانیاری زیاتر: کریستیانەکان داوای کشاندنەوەی گرووپە میلیشیاکان لە دەشتی نەینەوا و گوند و ئاواییەکانی کریستیان و ئێزدینشین دەکەن. لە هەمانکاتدا، دۆسییەی ئەمنیی ناوچەکان ڕادەستی خەڵکی ڕەسەن بکرێتەوە لە پێناو زامنکردنی ئاسایسی ناوچەکە و دوورخستنەوەی دەستی میلیشیاکان لە دەستوەردان لە ژیان و گوزەرانی هاووڵاتییان.

ئەوەی پێویستە بیزانیت: ئێستا کریستیانەکان داوای هەموارکردنەوەی یاسای هەڵبژاردنی ئەنجوومەنی نوێنەران و هەڵبژاردنی ئەنجوومەنی پارێزگاکان دەکەن، بۆ ئەوەی پێکهاتەی کریستیان بتوانێت نوێنەرایەتیی ڕاستەقینەی خۆی بکات، هاوکات داوای جێبەجێکردنی ماددەی 140ـی دەستووری عێراقی دەکەن، بۆ ئەوەی پارێزگاری لە دیموگرافیا و مێژووی ناوچەکانیان بکەن.

چارەسەرەکان: کریستیانەکان بۆ چارەسەرکردنی کێشەکانیان داوا دەکەن بە ڕاوێژ لەگەڵ مەرجەعە ئایینی و سەرۆکی کەنیسەکان، یاسایەکی تایبەت بە باری کەسێتیی پێکهاتە ئایینییەکانی دیکەی دەرەوەی ئیسلام دەربکەن، لەوانە کریستیان، ئێزدی، سابیئەی مەندائییەکان، بۆ پارێزگاری لە مافی پێکهاتەکان و زامنکردنی سەربەخۆیی لە کاروبارە ئایینییەکانیاندا.