فەریق جەبار یاوەر: ساڵی پار چەکدارانی داعش تەنیا 25 کردەی تیرۆرستیان کردووە

ئاڤا نیوز

 

ئەمینداری پێشووی وەزارەتی پێشمەرگە دەڵێت: لەو ناوچانەی پێشمەرگە دەیانپارێزێت، چالاکی داعش بە تەواوی کەمبووەتەوە و ئاماری شەش ساڵ دەریدەخات چالاکی داعش لاواز بووە.

 

وێنە گەورەکە: چەکدارانی داعش لە ساڵی 2014 توانیان ڕووبەرێکی بەرفراوان لە عێراق و سووریا داگیر بکەن و هەزاران کەسیان کوشت و هەزارانی دیکەیان ئاوارە کرد.

 

لێدوانی فەرمی: فەریق جەبار یاوەر، ئەمینداری پێشووی وەزارەتی پێشمەرگە بە ئاڤا میدیای ڕاگەیاند: بەپێی ئامارەکان لەناوچەکانی کوردستانی دەرەوەی ئیدارەی هەرێمی کوردستان لە ساڵی 2024 داعش توانیویەتی تەنیا 25 کردەی تیرۆرستی ئەنجام بدات، پێنج کەس شەهید بوون و 12 کەس بریندار بوون و یەک کەسیش ڕفێنراوە، بەڵام لە ساڵی 2018 لە هەمان ئەو شوێنانە داعش 456 کردەی سەربازی ئەنجام دابوو، هەزار و 672 شەهید و بریندار و ڕفێنراو هەبوو.

 

زانیاریی زیاتر: فەریق جەبار یاوەر ئەوەش دەڵێت: لە سنووری خانەقینەوە تا سحێلا نزیکەی 650 کیلۆمەترە، لە هەندێ ناوچە بە پانتایی و درێژی 40 کیلۆمەتر هیچ هێزێکی لێ نییە، ئەمەش وادەکات داعش ئەو ناوچەیە وەک ناوچەی چالاکی خۆی بەکاربێنێت. ئەو دوو لیوا هاوبەشەی دروستکراون هێشتا جێگیرنەکراون و کەلوپەل و پێویستییەکانیان بۆ دابین نەکراوە.

هۆکارە زانراوەکان: بە وتەی ئەمینداری پێشووی وەزارەتی پێشمەرگە، هۆکاری سەرەکی سەرهەڵدانی بیری توندڕەوی داعش لە عێراق ئەمانە بوون:

-  قورسی و خراپی بارگوزەرانی ژیان لە عێراق.
- خراپی مامەڵەکردنی سوپای عێراق لەگەڵ ناوچە سوننە نشینەکان لە موسڵ و پارێزگاکانی دیکەی سوننەنشین.
- ئەو کێشانەی هەبوون لەنێوان هەرێمی کوردستان و بەغدا هۆکار بوون بۆ سەرهەڵدانی داعش و تەشەنەکردنی، چونکە داعش ئەو ناکۆکیانەی قۆستەوە بۆ خۆ پێگەیاندن.