نێچیرڤان بارزانی و كرۆسێتۆ پەیوەندییەکانی هەرێمی کوردستان و ئیتاڵیایان تاوتوێ کرد

ئاڤا نیوز

لە پەراوێزی بەشداریكردنی لە كۆنفرانسی ئاسایشی میونشن لە ئەڵمانیا، سەرۆكی هەرێمی كوردستان لەگەڵ وەزیری بەرگریی ئیتاڵیا كۆبوونەوە.

وێنە گەورەكە: بەمەبەستی بەشداریكردنی لە كۆنفرانسی ئاسایشی میونشن لە ئەڵمانیا، ئەمڕۆ هەینی 14-2-2025، نێچیرڤان بارزانی، سەرۆكی هەرێمی كوردستان بە سەردانێك گەیشتە ئەڵمانیا.

ڕاگەیێنراوی فەرمی: سەرۆكایەتیی هەرێمی كوردستان ڕایگەیاند: لە یەكەم دیداریدا، ئەمڕۆ نێچیرڤان بارزانی لەگەڵ گويدۆ كرۆسێتۆ، وه‌زيرى به‌رگريى ئيتاڵيا، كۆبووەوە و پەیوەندییەکانی هەرێمی کوردستان و ئیتاڵیا و بەهێزکردنی هاريكاريى هاوبەشى نێوان هه‌ردوولا و به‌ره‌نگاربوونه‌وه‌ى هه‌ڕه‌شه‌كانى داعشيان تاوتوێ كرد.

- نێچیرڤان بارزانی پێزانینی هەرێمی کوردستانی بۆ ئەو پشتگیرییە دووپات کردەوە کە ئیتاڵیا لە بواری ڕاهێنانی هێزەکانی پێشمەرگە و بەهێزکردنی تواناکانی لە چوارچێوەی هاوپەیمانيی نێودەوڵەتيی دژى داعش پێشکەشی دەکات، هه‌روه‌ها داكۆكى له‌ پێويستيى عێراق و هه‌رێمى كوردستان به‌ به‌رده‌واميى پشتگيريى نێوده‌وڵه‌تى بۆ نه‌هێشتنى يه‌كجاره‌كيى داعش كرده‌وه‌.

- وەزیری بەرگريی ئیتاڵیا جەختی لەسەر گرنگيی هاوبەشيی لەگەڵ هەرێمی کوردستان و پابه‌نديى وڵاتەکەی بۆ بەردەواميی پشتگیريی پێشمەرگە و بەهێزکردنی هاوکاريی سەربازی و ئەمنی له‌گه‌ڵ عێراق و هه‌رێمى كوردستاندا کرده‌وه‌، هه‌روه‌ها ستايشى ڕۆڵى هه‌رێمى كوردستانى كرد له‌ پاراستنى سه‌قامگيرى له‌ ناوچه‌كه‌دا‌.