ئۆتۆمبێلی'بیکاشۆ'ـی چینی 4 هەزار دۆلار لە بیکاشۆی ژاپۆنی هەرزانترە

ئاڤا نیوز

 

دوو ئۆتۆمبێلی تۆیۆتا کڕۆلا کە لە هەرێمی کوردستان و لەناو خەڵک بە 'بیکاشۆ' ناسراون، هەمان ڕەنگ، مۆدێل، دیزاینن و زۆربەی تایبەتمەندیەکانیشیان وەکو یەکە، کەچی زیاتر لە چوار هەزار دۆلار واتا چل وەرەقە جیاوازی لە نرخیان هەیە؛ یەکێکیان دروستکراوی چینە، ئەوی دیکەش دروستکراوی ژاپۆنە.

 

چیرۆکی سەرەکی:  بیکاشۆیەکیان  نرخی کەمترە و دروستکراوی وڵاتی چینە، ئەوەی دیکەیان پارچەکانی لە وڵاتی ژاپۆن دروست کراوە و لە تورکیا بەیەکەوە بەستراوەتەوە، ئەمیان نرخی چوار هەزار دۆلارێک گرانترە. بە ڕووکەش دوو ئۆتۆمبێلی تەواو هاوشێوەن، بەڵام بۆ ئەو کەسانەی لە بواری کڕین و فرۆشتنی ئۆتۆمبێل کار دەکەن جیاوازن.

لێدوانی فەرمی: کۆمپانیای تۆیۆتا لە عێراق دەڵێت بیکاشۆی چینی تەنیا بۆ وڵاتی چین دروست کراون نەوەک هەناردەکردنی بۆ وڵاتانی دیکە.

 
زانیاریی زیاتر: لە بازاڕەکانی هەرێمی کوردستان، تۆیۆتا کرۆلا سێ جۆری کڕین و فرۆشتنیان پێوەدەکرێت، تایبەتمەندی خەلیجی، تایبەتمەندی ئەمریکی و کرۆلای چینی کە ئەوەی سێیەمیان نرخی لە دوو جۆرەکەی دیکە کەمترە، بەڵام هێشتا لە وەرزی هاوین تاقینەکراوەتەوە کە لە پلەی گەرمی بەرز سەکەوتوو دەبێت یان نا.

 

هۆکارە زانراوەکان: بەهۆی هەرزانیان لە بازاڕەکان، ماوەی چەن ساڵێکە  ئۆتۆمبێلە چینییەکان لە بازاڕەکانی جیهاندا خواستێکی زۆریان لەسەرە، لە هەرێمی کوردستانیش هاوشێوەی وڵاتان خواستێکی زۆریان لەسەرە و بەتایبەت لەم ساڵانەی دواییدا چینییەکان بازاڕی ئۆتۆمبێلیان بەڕێژەیەکی زۆر بۆ خۆیان قۆرخ کردووە.