چەند پەیامێک لە پارتییەوە: سوورین لەسەر دابینکردنی شایستە داراییەکانی کوردستان

ئاڤا نیوز

مەکتەبی سیاسیی پارتی لە پەیامێکدا  "دۆخی عێراق بە قۆناغێکی هەستیار و مەترسیدار " دادەنێت،  ئاماژە بۆ فشارە بەردەوامەکانی سەر کوردستان دەکات و هۆشداری دەدات لەوەی دەستوور لەبەردەم مەترسیی ڕاستەقینەدایە، وێڕای ئەمانەش جەخت لە پاراستنی دەسەڵات و ماف و شایستە داراییەکانی هەرێمی کوردستان دەکاتەوە.

چیرۆکی سەرەکی: مەکتەبی سیاسیی پارتی دیموکراتی کوردستان لە پەیامێکدا بە بۆنەوەی (33)ەمین ساڵیادی ڕاپەڕین، جەخت دەکاتەوە؛ ڕاپەڕین پەیامی بە هەمووان دا كە گەلی كورد و خەڵكی كوردستان بە هیچ كلۆجێك مل بۆ زۆرداران نادەن، چەند بەهێز و دڵڕەق و بێ مروەتیش بن.

ڕاگەیێنراوی فەرمی: پەیامەکەی مەکتەبی سیاسی پارتی چەند تەوەرەێکی جیاواز لە خۆدەگرێت و چەند پەیامێک ئاراستەی خەڵکی کوردستان، لایەنە سیاسییەکان و حکومەتی عێراق دەکات:

- سەركەوتنی گەل و نیشتیمان لە یەكبوون و یەكدەستی و برایەتی دایە، پەرتەوازەیی و لێكترازان تەنیا نەهامەتییە.

- جەخت لەسەر ڕێکخستنی نێو ماڵی کوردستان دەکەینەوە بە جۆرێک هەمووان لەسەر پرسە ستراتیژییەكان هاوئاراستە و یەکگوتار بین.

- هەموو هەوڵێك دەدەین لەپێناو چارەسەرکردنی کێشەکان، ئەرکی لەپێشینەمان پاراستنی خاك و خەڵك و قەوارەی هەرێمی کوردستان و دەستکەوتەکانمان بێت.

- دۆخی عێراق بەرەو قۆناغێکی هەستیار و مەترسیدار دەڕوات و دەستوور لەبەردەم مەترسی ڕاستەقینەدایە.

- هەوڵی ناوخۆیی و دەرەكی ئاشكرا لە ئارادایە بۆ پاشگەزبوونەوە لە هەموو ڕێكکەوتنە سیاسییەكانی نێوان هەولێر و بەغدا.

- فشاری زۆر و هەمەلایەنە بەردەوامن بۆ سەپاندنی هەندێك واقیع بەسەر كوردستاندا كە بە درێژایی سەدەیەك بە هێرش و پەلاماری سەربازی نەیانتوانیوە بیسەپێنن.

- پێویستە بەردەوامبین لە دانوستان و گفتوگۆکردن لەگەڵ بەغدا بۆ چارەسەرکردنی و یەکلاکردنەوەی کێشەکان بە جۆرێک دووبارە نەبنەوە.

- سوورین لەسەر پاراستنی دەسەڵات و ماف و شایستە داراییەکانی هەرێمی کوردستان. پێداگرین لەسەر چاکترکردنی باری ئابووری و بژێوی خەڵک. 

- بەڵێن دەدەین بە جیددی و ڕاستگۆیانە كار بۆ ئەنجامدانی هەڵبژاردنێكی ئازاد و پاك و بێگەرد بكەین.