هەنگاریا: دۆخی سەقامگیری هەرێمی کوردستان فاکتەرە بۆ ڕاکێشانی سەرمایەی بیانی

ئاڤا نیوز

 

كونسوڵی گشتیی هەنگاریا لە هەرێمی كوردستان ڕایدەگەیەنێت، دۆخی سەقامگیری ئاسایش و كرانەوەی ئابووریی هەرێمی كوردستان بەڕووی جیهاندا، ڕۆڵیان هەیە لە ڕاكێشانی سەرمایەی بیانی بۆ ناوچەكە.

 

وێنە گەورەكە: بەرپرسانی باڵای وەزارەتی بازرگانی و پیشەسازیی حكومەتی هەرێمی كوردستان، پێشوازییان لە كونسوڵی گشتیی هەنگاریا لە هەرێمی كوردستان و شاندێكی بازرگانی ئەو وڵاتە كرد.

 

لێدوانی فەرمی: بەپێی ڕاگەیێنراوی ماڵپەڕی فەرمی حكومەتی هەرێمی كوردستان، سەروەر كەمال هاواری، بریكاری وەزارەتی بازرگانی و پیشەسازی بۆ كاروباری بازرگانی، بە شاندە هەنگاریەكەی ڕاگەیاندووە، هەرێمی كوردستان مەبەستیەتی پەیوەندییە دێرینەكانی لەگەڵ وڵاتی هەنگاریا پەرە پێبدات، بەتایبەت لە بوارەكانی بازرگانی و گەشتوگوزاردا. 

 

ئەتیلا تۆث، کونسوڵی گشتيی هەنگاریا لە هەرێمی کوردستان، باسی لەو هۆكارانە كرد كە ڕۆڵیان هەیە لە ڕاكێشانی سەرمایەی بیانی بۆ ناوچەكە، دووپاتیشی كردەوە دۆخی سەقامگیری ئاسایش و كرانەوەی ئابووریی هەرێمی كوردستان بەڕووی جیهاندا، دوو فاكتەری بەهێزن بۆ ڕاكێشانی وەبەرهێنانی بیانی.

 

زانیاریی زیاتر: جگە لە بریكاری وەزارەت بۆ كاروباری بازرگانی، هەریەک لە تیمی ڕاوێژکارانی وەزارەت، بەڕێوەبەرانی گشتيی پلاندانان و بازرگانی، بەڕێوەبەرانی هێما بازرگانیيەكان و کۆمپانیاکان و گەشەپێدانی پیشەسازيی هەولێر، ئامادەی كۆبوونەوەكە بوون و سەرنج و تێبینییەكانیان بۆ گەشەپێدانی پەیوەندییە ئابووری و بازرگانییەكانی هەرێمی كوردستان و هەنگاریا خستەڕوو.