ئەردۆغان وێنەی بەرپرسانی "دەزگای هەواڵگریی تورکیا" لە هەژماری خۆی دەسڕێتەوە

ئاڤا دیجیتاڵ

 

ڕەجەب تەیب ئەردۆغان، سەرۆککۆماری تورکیا و یەڵماز تونج، وەزیری دادیی تورکیا، وێنەکانی بۆنەیەکیان بڵاو کردەوە کە بەبۆنەی 97 ساڵەی دامەزراندنی دەزگای هەواڵگرییەوە ڕێکخرا بوو، بەهۆی ئەوەی لە وێنەکاندا رووخساری بەشێک لە بەرپرسانی سووپای تورکیا دەرکەوت بوو، سەرجەم بڵاوکراوەکانی پەیوەست بەو هەواڵە لە "ئێکس" لابران.

 

چیرۆکە سەرەکییەکە: لە چەند رۆژی ڕابردوودا یادی 97 ساڵەی دامەزراندنی دەزگای هەواڵگریی تورکیا (میت) بەڕێوەچوو، رەجەب تەیب ئەردۆغان لە هەژماری تایبەتی خۆی لە "ئێکس" چەند وێنەیەکی کاتی پێشکەشکردنی گوتارەکەی بڵاو کردووەتەوە، "لە وێنەکاندا رووخساری بەشێک لە لە بەرپرسانی باڵای دەزگای هەواڵگری تورکیا" دەرکەوتووە، دوای ئەوە یەڵماز تونج، وەزیری دادیی تورکیا هەمان ئەو وێنانەی لە هەژمارەکەی خۆیدا بڵاودەکاتەوە. دوای ماوەیەک هەردووکییان وێنەکانییان لە "ئێکس" سڕییەوە.

 

هۆکارە زانراوەکان: بەگوێرەی یاسای دەزگای هەواڵگریی تورکیا، بڵاوکردنەوەی وێنەی بەرپرسانی دەزگای هەواڵگر تورکیا قەدەغەیە، "بە گوێرەی ماددەی 7ـی دەزگای هەواڵگریی تورکیا، سزای ئاشکراکردنی ئەندامانی ئەو دەزگایە زیندانیکردنە بۆ ماوەی ( 2-8 ) ساڵ.

 

ئەوەی لەبارەیەوە دەگوترێت: بڵاوبوونەوەی ئەو وێنانە کاردانەوەی جیاوازی دروست کرد، بەجۆرێک بەشێک لە سیاسییەکان ئەوە بە مەترسی دەبینن بۆ سەر دەزگای هەواڵگریی تورکیا، ئەمە لە کاتێکدایە تورکیا ئێستا لە شەڕێکی چڕدایە لەگەڵ چەکدارانی پارتی کرێکاران لە تورکیا.

 

باکگراوند: پێنجی ئازاری 2020، بەڕش تێرکئۆغلو، بەڕێوەبەری هەواڵی "کەناڵی ئۆدە" و ڕۆژنامەنووس هولیا کڵنج، بەهۆی پەخشکردنی ڕاپۆرتێکی هەواڵی سەبارەت بە پرسەی ئەندامێکی دەزگای هەواڵگریی تورکیا کە لە لیبیا گیانی لەدەستدابوو، دەستگیر کران. هەروەها ماڵپەری فەرمیی کەناڵەکەش داخرا. رۆژی دواتر بەڕش پێهیلیڤان کە ئەوکات سەرنووسەری رۆژنامەی ئۆدەتیڤی بوو، بە هەمان هۆکار دەستبەسەر کرا.