سوودانی: ئامادەین هاوكاری هەموو لایەك بكەین بۆ بەرەنگاربوونەوەی ماددەی هۆشبەر

 

ئاڤا نیوز

سەرۆكوەزیرانی عێراق مەترسییەكانی تەشەنەسەندنی ماددە هۆشبەرەكان لەگەڵ بەڕێوەبەری جێبەجێكاری نووسینگەی نەتەوە یەكگرتووەكان بۆ ماددەی هۆشبەر، تاوتوێ دەكات و ڕایدەگەیێنێت، ئامادەن هاوكاری هەموو لایەك بكەن بۆ ڕووبەڕووبوونەوەی مەترسییەكانی ماددە هۆشبەرەكان.

چیرۆكی سەرەكی: لە پەراوێزی بەشداریكردنی لە شەست و یەكەمین كۆنفرانسی ئاسایشی میونشن، محەممەد شیاع سوودانی، سەرۆكوەزیرانی عێراق لەگەڵ غادە والی، بەڕێوەبەری جێبەجێكاری نووسینگەی نەتەوە یەكگرتووەكان بۆ ماددە هۆشبەرەكان و تاوان، دیدارێكی ئەنجامدا و تێیدا مەترسییەكانی تەشەنەسەندنی ماددەی هۆشبەر تاوتوێ كران.

ڕاگەیێنراوی فەرمی: نووسینگەی سەرۆكوەزیرانی عێراق لەبارەی دیدارەكە بەیاننامەیەكی بڵاوكردووەتەوە و تێیدا هاتووە، سوودانی جەختی كردووەتەوە لە گرنگی هەماهەنگی نێوان وڵاتان سەبارەت بەم دۆسیە مەترسیدارە و ئامادەیی عێراقی دووپاتكردەوە بۆ هاوكاریكردن لەگەڵ هەموو ڕێكخراو و دامەزراوە تایبەتمەندەكان لە ڕووبەڕووبوونەوەی مەترسییەكانی ماددە هۆشبەرەكان و تاوانە سنووربەزێنەكان.

لەلایەكی دیكەوە: غادە والی، ستایشی ئەو هەنگاوانەی كرد كە عێراق لە بواری بەرەنگاربوونەوەی ماددە هۆشبەرەكان و تاوانە ڕێكخراوەكاندا هاویشتوویەتی، ئامادەیی نووسینگەكەیشی دەربڕی بۆ هاوكاریكردنی عێراق لەو بوارەدا و كردنەوەی بارەگایەكی هەرێمی لە بەغدا.