لە مانگی ڕەمەزان بەشەخۆراکی مانگانەی هاووڵاتییان زیاد دەکرێت

ئاڤا نیوز

 

وەزارەتی بازرگانیی عێراق ئاشکرایکرد، پێش مانگی ڕەمەزان سەبەتەیەکی نوێی بەشەخۆراک دابەش دەکرێت. هاوکات بەگوێرەی وەزارەتی بازرگانیی عێراق تیمێکی وەزاریش پێکهێنراوە بۆ چاودێریی بازاڕەکان.

 

لێدوانی فەرمی: محەممەد حەنوون، گوتەبێژی وەزارەتی بازرگانیی عێراق ڕایگەیاند: لە ڕۆژی پێنجشەممە ڕێککەوتی 20-2-2025، سەبەتەیەکی  نوێی بەشەخۆراک دابەش دەکرێت، ئەمەش یارمەتیدەر دەبێت بۆ جێگیرکردنی نرخی خۆراک لە بازاڕەکاندا.

 

زانیاریی زیاتر: حەنوون ئاماژەی بەوەشکرد، وەزارەتی بازرگانی لیژنەیەکی پشکنین و چاودێری پێکهێناوە بۆ کۆنتڕۆڵکردنی نرخی خۆراک بۆ مانگی ڕەمەزان لە بازاڕەکاندا.

 

ئەمەش بزانە: پێشتر سەبەتەی خۆراکی مانگانە حەوت ماددەی لەخۆگرتبوو، بەڵام بۆ مانگی ڕەمەزان مەعکەرۆنی، نیشاستە، شعرییە و ئاردی سفر زیاد دەکرێت و بەمەش ژمارەیان بۆ 11 ماددە زیاد دەکرێت و پێش مانگی ڕەمەزان دەگاتە دەستی هاووڵاتییان.