شەش مانگە مۆلیدە ئەهلییەکانی سلێمانی کاریان پێنەکراوە

ئاڤا نیوز

بە هۆی گەیشتنی کارەبای پڕۆژەی ڕووناکی بە پارێزگای سلێمانی، ماوەی شەش مانگە مۆلیدە ئەهلییەکانی سلێمانی کاریان پێنەکراوە. ئێستا ماوەی ئەو گرێبەستەش تەواوبووە کە پێشتر لەگەڵ خاوەن مۆلیدە ئەهلییەکان کرابوو. 

وێنە گەورەکە: یەکێکە لە پڕۆژە گرنگ و ستراتیژییەکانی حکومەتی هەرێمی کوردستان لە کابینەی نۆدا، پڕۆژەی ڕووناکی و کارەبای 24 کاتژمێرییە، ئێستا سەنتەری هەموو شارەکان خاوەنی کارەبای بەردەوامن و لە کۆتایی 2026 هەموو هەرێمی کوردستان دەبێتە خاوەنی کارەبای 24 کاتژمێری.

زانیاری پەیامنێر: چۆمان مەحموود، پەیامنێری ئاڤا میدیا لە سلێمانی ڕایگەیاند، پڕۆژەی ڕووناکی لە سلێمانی وایکردووە ماوەی شەش مانگە مۆلیدە ئەهلییەکان کاریان پێنەکراوە.

چۆمان مەحموود دەشڵێت، لە ڕێگەی کۆمەڵەی مۆلیدە ئەهلییەکانەوە خاوەنی مۆلیدەکان ئاگادارکراونەتەوە، کە گرێبەستەکە کۆتایی هاتووە و دەتوانن مۆلیدەکانیان لاببەن، چونکە پڕۆژەی ڕووناکی سەرکەوتوو بووە.

زانیاریی زیاتر: حکومەتی هەرێمی کوردستان بۆ ماوەی شەش مانگ گرێبەستی لەگەڵ خاوەن مۆلیدەکان کردبوو، بۆ ئەوەی لە کاتی تاقیکردنەوەی پڕۆژەی ڕووناکی لە گەڕەکەکانی شار و دروستبوونی هەر گرفتێکی تەکنیکی کار بە مۆلیدەکان بکرێت، بۆ ئەوەش مانگانە مووچەیەکی دیاریکراوی بۆ خاوەنی مۆلیدەکان دابین کردبوو.

ژمارەکان وادەڵێن: لە هەرێمی کوردستان حەوت هەزار مۆلیدەی ئەهلی کاری پێدەکرا، لەو ژمارەیەش هەزار و 500 مۆلیدەیان لە سلێمانی بوون.

ئەوەی پێویستە بیزانیت: بڕیارە لە نێو مانگی 12ی ئەمساڵدا کارەبا پڕۆژەی ڕووناکی بە ناحیەی پیرەمەگروون و قەزای چەمچەماڵ بگات.

بۆچی گرنگە: بە هۆی دوکەڵی مۆلیدە ئەهلییەکانەوە هەوا و ژینگەی شارەکانی کوردستان پیسببوون، هۆکارێکیش بوون بۆ توشبوونی خەڵک بە نەخۆشی شێرپەنجە، بە جێبەجێکردنی پڕۆژەی ڕووناکی هەوا و ژینگەی شارەکان خاوێنە و خەڵکیش لە مەترسی تووشبوون بە نەخۆشی پارێزراون.