قەییوومێک کرایە سەرۆک شارەوانی وان

ئاڤا نیوز

 

عەبدوڵڵا زەیدان، سەرۆکی گەورە شارەوانی وان، دوای ئەوەی بڕیاری 3 ساڵ و 9 مانگ زیندانیکردنی بۆ دەرچوو، بە بڕیاری وەزارەتی ناوخۆ لە پۆستەکەی دوورخرایەوە و ئۆزان باڵجی، والی وان لە شوێنەکەی دانرا. 

 

چیرۆکی سەرەکی: ماوەی سێ ڕۆژە خەڵکی شاری وانی باکووری کوردستان لەبەردەم باڵەخانەکەی شارەوانی گردبوونەتەوە و ناڕەزایەتی لە دژی بڕیاری دەستگیرکردنی سەرۆک شارەوانییەکەیان دەردەبڕن.

 

ڕاگەیێنراوی فەرمی: وەزارەتی ناوخۆی تورکیا ڕایگەیاند: عەبدوڵڵا زەیدان، سەرۆکی گەورە شارەوانی وان بە تۆمەتی "هاوکارییکردنی پەکەکە بە خواست و ویستی خۆی، بڕیاری سی ساڵ و 9 مانگ زیندانییکردنی بۆ دەرچوو"، هاوکات، ئۆزان باڵجی، والی ئەو شارە لە شوێنەکەی دەستبەکاردەبێت. 

 

کاردانەوەکان: لابردنی سەرۆک شارەوانی وان هاوشێوەی شارەوانییەکانی دیکەی سەر بە  دەم پارتی، کاردانەوەی لێکەوتەوە، خەڵکی وان و دەم پارتی  ئەمە بە " ڕێزنەگرتن لە ئیرادە و دەنگی خەڵک" ناودەبەن. بەوەی دەم پارتی لە هەڵبژاردنەکانی 31ی ئاداری ساڵی ڕابردوو  ئەو شارەوانییەی بە دەنگی زۆرینەی خەڵک بەدەست هێنا.