26  ساڵ بەسەر دەستگیرکردنی عەبدوڵڵا ئۆجەلان تێدەپەڕێت

ئاڤا نیوز

 

ئەمڕۆ 26 ساڵ بەسەر دەستگیرکردنی عەبدوڵڵا ئۆجەلان، ڕێبەری پارتی کرێکارانی کوردستان 'پەکەکە'، تێدەپەڕێت.

 

چیرۆکی سەرەکی: ڕۆژی 15-2-1999، عەبدوڵڵا ئۆجەلان، ڕێبەری پەکەکە لە وڵاتی کینیا لە ئۆپەراسیۆنێکی هاوبەشی دەزگای هەواڵگریی ئەمریکا و تورکیا و ئیسرائیل دەستگیر کرا.

 

ئەوەی پێویستە بیزانیت: دوای دەستگیرکردنی عەبدوڵڵا ئۆجەلان، گواسترایەوە بۆ تورکیا و لە زیندانێکی تاکەکەسی لە دوورگەی ئیمرالی لە دەریای مەڕمەڕە لە تورکیا ڕاگیرا تاوەکو ئێستا.

 

قووڵتر: ساڵانە لایەنگرانی پەکەکە خۆپیشاندان دەکەن و داوا دەکەن ڕێبەرەکەیان ئازاد بکرێت، لە ڕۆژی دەستگیرکردنیشی چالاکی جۆراوجۆر دەکەن و تاوەکو ئێستا چەندین کەسیش بۆ ئەو مەبەستە خۆیان سووتاندوە.

 

لەلایەکی دیکەوە: بڕیارە ڕۆژی یەکشەممە 16ی ئەم مانگە، شاندی دەم پارتی سەردانی هەرێمی کوردستان بکات و  لە چوارچێوەی گفتوگۆکانیان لەگەڵ لایەنە سیاسییەکان، چاویان بە سەرۆک مەسعود بارزانی و بەرپرسانی دیکەی حزبیی و حکومی هەرێمی کوردستان بکەوێت.

 

ئەوەی پێشبینی دەکرێت: چاوەڕوان دەکرێت، دوای دیدارەکانی شاندی دەم پارتی لەگەڵ عەبدوڵڵا ئۆجەلان لە ئیمرالی، پەیامی نوێی ئۆجەلان لەبارەی قۆناغی نوێی پرۆسەی ئاشتی لە تورکیا بڵاوبکرێتەوە.