ئاڤا چیرۆکی پەیوەندییەکی سەرۆکوەزیران مەسرور بارزانی لە داڤۆسەوە بۆ پارێزگاری هەولێر ئاشکرا دەکات

ئاڤا نیوز

 

بەڕێوەبەری ناحیەی گوێڕ، بۆ یەكەمجار لە ڕێگەی ئاڤا میدیاوە چیرۆكی پەیوەندییەكی سەرۆكوەزیران مەسرور بارزانی لە داڤۆسەوە بۆ پارێزگاری هەولێر، ئاشكرا دەكات سەبارەت بە پاڵاوگە نایاساییەكان.

 

وێنە گەورەكە: یەكێك لەو پرسانەی كە بەردەوام سەرۆكوەزیران مەسرور بارزانی لە كۆبوونەوە و دیدار و لێدوانە ڕۆژنامەوانییەكانیشی جەختی لێدەكاتەوە، پاک ڕاگرتنی ژینگە و ڕێگریكردنە لە پیسكردنی ژینگەی هەرێمی كوردستان، لەو چوارچێوەیەدا لە ماوەی ڕابردوودا چوار بڕیاری سەبارەت بە پاڵاوگە نایاساییەكان و مۆلیدەی گەڕەكەكەكان، كارگەكان و بەرهەمهێنانی سەوزە بە ئاوی پیس دا.

 

لێدوانی فەرمی: مەسعود نووری، بەڕێوەبەری ناحیەی گوێڕ لە میانی بەشداریكردنی لە بەرنامەی مۆری ئاڤا كە ژووان قەرەداغی، پێشكەشكاری ئاڤا میدیا پێشكەشی دەكات ڕایگەیاند: سەرۆكوەزیران مەسرور بارزانی، زۆر بە خەمە بۆ بابەتی ژینگەی هەرێمی كوردستان، زۆر جددیشە لەسەر بابەتەكە، نموونەیەك باس دەكەم كە پێشووتر لە هیچ میدیایەك باس نەكراوە، ئەو كاتەی سەرۆكوەزیران لە داڤۆس بوو، سەرەڕای سەرقاڵبوونی بە چالاكییەكانی كۆنگرەكە و دیداری لەگەڵ بەرپرسانی وڵاتان، لەوێوە لەڕێگەی پارێزگاری هەولێرەوە پەیوەندیمان پێوە كرا و گوتی، هەر كەس و لایەنێك پێی وابێت كە نابێت ڕێوشوێنی لەبەرامبەر بگیرێتە بەر و ببێتە هۆكار بۆ پیسبوونی ژینگە، دەبێت توندترین ڕێوشوێنی لەبەرامبەر بگیرێتە بەر.

 

لەلایەکی دیکە: بەڕێوەبەری ناحیەی گوێڕ ئاماژەی بۆ ئەوەش کرد، ئەو جددیەتەی سەرۆكوەزیران مەسرور بارزانی هێزێكی گەورەیە بۆ ئێمە بۆ ئەوەی ڕێگە نەدەین بە هیچ كەس و لایەنێك سەرپێچیی ڕێنماییەكان بكات و ژینگە پیس بكات، چونكە لە ڕابردوودا خەڵكێك هەبوو كە پێیوابوو نابێت لێپرسینەوەی لەگەڵدا بكرێت، بەڵام بە بڕیاری سەرۆكوەزیران چاوپۆشی لە كەس ناكرێت.