وەزیری دەرەوەی بەریتانیا بۆ نێچیرڤان بارزانی: له‌ پشتگیریکردنی هه‌رێمی کوردستان به‌رده‌وام ده‌بین

ئاڤا نیوز

لە به‌رده‌وامیی دیدار و کۆبوونه‌وه‌کانیدا له‌ کۆنفرانسی ئاسایشی میونشن، نێچیرڤان بارزانی، سەرۆکی هەرێمی کوردستان لەگەڵ دەیڤید لامی، وەزیری دەرەوەی به‌ریتانیا کۆبووەوە.

 

ڕاگەیێنراوی فەرمی: لە کۆبوونەوەکەدا پەیوەندییەکانی به‌ریتانیا له‌گه‌ڵ عێراق و هەرێمی کوردستان تاوتوێ کران، هاوکات باسيان له‌ چۆنيه‌تيى بەهێزکردنی هاوکاری لە بواری سیاسی، ئەمنی و ئابووریدا كرد.

 

زانیاریی زیاتر: نێچیرڤان بارزانی، سەرۆکی هەریمی کوردستان پێزانینی خۆی بۆ پشتگیریی بەردەوامی به‌ریتانیا له‌ عێراق و هەرێمی کوردستان دەربڕی، به‌تایبه‌تی لە بواری بەرەنگاربوونەوەی تیرۆر و پەرەپێدانی دامەزراوە ئەمنییەکاندا، جەختی لەسەر گرنگیی بەردەوامیی ئەم پشتگیرییە کردەوە بۆ دەستەبەرکردنی سەقامگیری لە ناوچەکەدا.

 

لەلایەکی دیکەوە: دەیڤید لامی، وەزیری دەرەوەی به‌ریتانیا پابەندیی شانشینی یەکگرتووی بۆ بەهێزکردنی پەیوەندییەکانی لەگەڵ عێراق و هەرێمی کوردستان دووپات کردەوە و ڕایگه‌یاند: به‌ریتانیا له‌ پشتگیریکردنی هه‌رێمی کوردستان به‌رده‌وام ده‌بێت.

-ئاماژەی بە گرنگیی هەماهەنگیی هاوبەش لە پرسە هەرێمایەتییەکان و ڕووبەڕووبوونەوەی ئاستەنگە ئەمنی و ئابوورییەکان کرد.

 

ئەوەی پێویستە بیزانیت: هه‌ڵبژاردنی په‌رله‌مان و هه‌وڵه‌کانی پێکهێنانی حکومه‌تی داهاتووی هه‌رێمی کوردستان، دۆخی سووریا و پێشهاتە هەنووکەییەکانی ناوچەکە، لەگەڵ چەند پرسێکی دیکەی جێی بایەخی هاوبه‌ش، ته‌وه‌رێکی دیکه‌ی کۆبوونه‌وه‌که‌ بوو.