لە دهۆك نموونەی خوێنی كەسوكاری پێشمەرگە بێسەروشوێنەكان وەردەگیرێت

ئاڤا نیوز

 

تیمێكی پزیشكی لە شاری بەغداوە سەردانی شاری دهۆك دەكەن و نموونەی خوێنی كەسوكاری ئەو پێشمەرگانە وەردەگرن كە لە شەڕی ڕووبەڕووبوونەوەی ڕێكخراوی تیرۆریستی داعش بێسەروشوێن بوون.

 

چیرۆكی سەرەكی: لە قەزای حەویجەی سەر بە پارێزگای کەرکووک گۆڕێکی بە کۆمەڵ دۆزراوەتەوە 17 ڕووفاتی تێدایە و گومان دەکرێت پێشمەرگە بن، بۆ دڵنیابوونەوە لەو گومانە، تیمێك لە بەغداوە سەردانی شارەكانی هەرێمی كوردستان دەكات و نموونەی خوێن لە كەسوكاری پێشمەرگە دیلەكان وەردەگرێت بۆ ئەوەی پشكنینیان بۆ بكات و دی ئێن ئەی ڕووفاتەكان ئاشكرا بێت.

 

زانیاریی پەیامنێر: زەید تەها، پەیامنێری ئاڤا میدیا لە بادینان ڕایگەیاند: لەسەر ڕاسپاردەی سەرۆك بارزانی و سەرۆكوەزیران مەسرور بارزانی، ئەو لیژنەیە لە شاری بەغداوە هاتوونەتە شاری دهۆك و نموونەی خوێنی كەسوكاری ئەو پێشمەرگە دیلانە وەردەگرن كە دانیشتووی سنووری پارێزگای دهۆكن، پشكنینی دی ئێن ئەیان بۆ دەكەن و لەگەڵ ڕووفاتە دۆزراوەكانی حەویجە بەراوردیان دەكەن بۆ ئەوەی ناسنامەی ڕووفاتە دۆزراوەكان ئاشكرا بێت. 

 

قووڵتر: ژمارەیەكی بەرچاو لەو پێشمەرگانەی كە لە شەڕ و ڕووبەڕووبوونەوەی ڕێكخراوی تیرۆریستیی داعش لە ساڵانی 2014 و 2015 بەدیل گیران، لەلایەن ڕێکخراوەكەوە بردران بۆ قەزای حەویجە، بۆیە گومان دەكرێت هەر لە سنووری ئەو قەزایەش شەهید كرابن و لە گۆڕی بە كۆمەڵدا ژێرخاك خرابن.

 

لێدوانی فەرمی: نێچیرڤان مووسا، پارێزەری خۆبەخشی پێشمەرگە شەهید و بێسەروشوێنەكانی پارێزگای دهۆك بە ئاڤا میدیای ڕاگەیاند: 16 خێزان پشكنینیان بۆ دەكرێت، ئەو نموونەی خوێنەی كە وەردەگیرێت تەنیا بۆ بەراوردكردنی ڕووفاتەكان نییە، بەڵكوو بۆ سۆراغكردنیشیانە بۆ ئەوەی بزانین ئەو پێشمەرگانە شەهید بوون یان زیندوون.