بە سوڵحی عەشایەری کێشەی کوێخا دێرین چارەسەر کرا

ئاڤا نیوز

دوای زیاتر لە ساڵێک، دواجار کێشەی کوێخا دێرین بە سوڵحی عەشایەری چارەسەر کرا. کوێخا دێرین لەمبارەیەوە دەڵێت، "ئەمڕۆ کۆتایی بە کێشەکەمان هێنرا و بەم نزیکانە دەگەڕێمەوە هەرێمی کوردستان".

چیرۆکی سەرەکی: ڕۆژی 12-2-2024، دیوەخانی دێرین عوزێر کە پلەداری هێزی پێشمەرگەی سەر بە یەکەی 70ی یەکێتییە، لەلایەن هێزەکانی ئاسایشی سلێمانییەوە ڕووخێنرا، دواتر ئاسایشی سلێمانی لە ڕوونکردنەوەیەکدا وتی "بە داواکردنی سەرانە و پارە وەرگرتن لە سەرمایەدارێک، بڕیاری دەستگرتن بەسەر ماڵ و سامانی کوێخا دێرین دەرکراوە"، بەڵام دێرین عوزێر چووە دەرەوەی وڵات و دەستگیر نەکرا.

وێنە گەورەکە: ئەمڕۆ 15-2-2025، بە ئامادەبوونی هەڤاڵ ئەبوبەکر، پارێزگاری سلێمانی و شاڵاو کۆسرەت ڕەسوڵ، ئەندامی مەکتەبی سیاسیی یەکێتی و زیاد جەبار، بەرپرسی مەڵبەندی یەکێتی لە سلێمانی و چەندین کەسایەتی دیکە، بە سوڵحی عەشایەری کێشەکەی کوێخا دێرین لەگەڵ ئەو ماڵەی لەلایەن پێشمەرگەکانی دێرین عوزێرەوە تەقەی لێکرابوو چارەسەر کرا.

لێدوانی فەرمی: کوێخا دێرین، لەبارەی سوڵحەکەوە بە ئاڤا میدیای ڕاگەیاند:

- هەرچەندە کێشەکە هی من نەبوو، بەڵکو دوو پێشمەرگەی من بوون، کە تەقەیان لە کوڕی ماڵێک کردووە و بە خراپی ئەزیەت بە قاچی گەیەندراوە و تاوەکو ئێستا چارەسەر وەردەگرێت، ئەم کێشەیەش بەشێوازێک زۆر گەورە کرا.

- بە هەوڵی کەسایەتییەکانی سلێمانی ئەمڕۆ کۆتایی بەم کێشەیە هێنرا و سوڵح کرا، بەڵام هیچ پارەیەکمان بەو ماڵباتە نەداوە، تەنانەت داوای خەرجی چارەسەرکردنی بریندارەکەشیان لێ نەکردووین.

ئەوەی پێویستە بیزانیت: کوێخا دێرین ئێستا لە وڵاتی بەریتانیا نیشتەجێیە، وەک خۆی دەڵێت بەم نزیکانە دەگەڕێتەوە هەرێمی کوردستان و هیچ گرفتێکی نییە.