پارتی: بەزووترین کات مژدەی پێکهێنانی حکومەت لەسەر سێ بنەما ڕادەگەیێنین

ئاڤا نیوز

پارتی دیموکراتی کوردستان ڕایدەگەیێنێ، لەگەڵ یەکێتی نیشتمانیی کوردستان لەسەر زۆر بابەتی ئیداری و سیاسی هاوڕایی دروست بووە، چاوەڕوانن بەزووترین کات مژدەی پێکهێنانی حکومەت لەسەر بنەمای یەک هەرێم، یەک حکومەت و یەک هێزی پێشمەرگە ڕابگەیێنرێت.

چیرۆکی سەرەکی: كۆمیتەی ناوەندیی پارتی ئەمڕۆ بەسەرپەرشتی سەرۆك بارزانی کۆبووەوە و حەوت تەوەریان تاوتوێ کرد، کە پێکهاتبوون لە گۆڕانکارییەکانی جیهان و شەڕی غەززە و سووریا، بابەتە ناوخۆییەکانی پارتی و هەرێمی کوردستان تاوەکو پرسی مووچە و پێکهێنانی حکومەت.
 
ڕاگەیێنراوی فەرمی: کۆمیتەی ناوەندی پارتی ناوەڕۆکی کۆبوونەوەکەی ئاشکرا کرد و گرنگترین خاڵەکانی ئەمانەن:

٠ باسی پڕۆسەى ئاشتى لە باکووری کوردستان و تورکیا و سەردانى شاندى دەم پارتى بۆ هەرێمى کوردستان کراوە،  ئەم پڕۆسە گرنگ و کاریگەرە پێویستى بە زەمینە خۆشکردن و هاوفکرى و هاوکارى هەیە، ئەوەى بۆمان بکرێت و پێویست بێت و لێمان داوابکرێت هاوکار و زەمینەخۆشکار دەبین.

٠ سەبارەت بە بودجە و مووچەى فەرمانبەران و جێبەجێ نەکردنى بڕگەکانى ڕێککەوتنەکان، پارتی جەخت لەسەر چارەسەرکردنى کێشەکان لە ڕوانگەى دەستوور و ڕێککەوتنەکان لەگەڵ بەغدا دەکاتەوە، دەڵێت شایستە داراییەکان و مافە دەستوورییەکانى هەرێمى کوردستان بە سیاسى نەکرێن و ماددە دەستوورییەکان وەکو ئەوەى کە لە دەستووردا هاتوون خوێندنەوەیان بۆ بکرێت و جێبەجێ بکرێن.

٠ لەبارەی پێکهێنانی حکومەت لێکتێگەیشتن و لێکنزیکبوونەوە دروست بووە و، لەسەر زۆر بابەتى سیاسى و ئیدارى لەگەڵ یەکێتى نیشتمانى کوردستان هاوڕایى دروست بووە و پێویستى بە گفتوگۆى زیاتر هەیە کە لەم هەفتەیەدا دەستپێدەکات و چاوەڕوانین لە کاتێکى نزیکدا موژدەى پێکهێنانى سەرۆکایەتى پەرلەمان و کابینەى نوێ لە سەر بنەماى یەک هەرێم، یەک حکومەت، یەک هێزى پێشمەرگە، ڕابگەیێنرێت.