بەشێک لە مامۆستایانی زانکۆی دهۆک داوای درێژکردنەوەی ڕاژەکانیان دەکەن

 

ئاڤا نیوز

بەشێک لە مامۆسیانی زانکۆی دهۆک کە هەڵگری بڕوانامەی دکتۆران، داوادەکەن بڕیاری خانەنشینی نەیانگرێتەوە و ڕاژەکانیان درێژ بکرێتەوە و لە خزمەت بەردەوام بن.

چیرۆکی سەرەکی: چەند ڕۆژێک پێش ئێستا حکومەتی هەرێمی کوردستان بە ئامانجی ڕێکخستنی ڕێکارە داراییەکان و خۆگونجاندن لەگەڵ خشتە نوێیەکانی بودجەی گشتیی عێراق بۆ ساڵی 2025 درێژکردنەوەی ڕاژەی فەرمانبەری لە هەر پلە و پۆستێک هەڵوەشاندەوە، بەڵام بەشێک لە مامۆستایانی زانکۆ و پەیمانگەکان داوای جێبەجێکردنی یاسایەکی عێراق بۆ درێژکردنەوەی ڕاژەکانیان دەکەن.

زانیاریی بەدەستهاتوو: بەشێک لە مامۆستایانی زانکۆی دهۆک کە هەڵگری بڕوانامەی دکتۆران و ناونیشانیان 'پڕۆفیسۆر و پڕۆفیسۆری یاریدەدەرە' نووسراوێکیان بۆ ئاڤا ناردووە و داوا دەکەن، بەپێی هەمواری یاسای خانەنشینی عێراقی ژمارە 26 ساڵی 2019 مامەڵەیان لەگەڵ بکرێت، هەروەها یاسای ژمارە 23 ساڵی 2008 بەندی یەکەم ماددەی 11 تایبەت بە یاسای خزمەتی زانکۆیی، ڕاژەکانیان درێژ بکرێتەوە و لە ئەرکەکانیان بەردەوام بن، چونکە بۆشایی دروست دەبێت و کاریگەری دەخاتە سەر پرۆسەی خوێندنی زانکۆ و پەیمانگەکان.

لێدوانی فەرمی:  دکتۆر توانا نەجەف، سەرۆکی دیوانی وەزارەتی خوێندنی باڵا و توێژینەوەی زانستی بە ئاڤای گوت، "بڕیاری حکومەتی هەرێمی کوردستانە و دڕێژکردنەوەی ڕاژە ڕاگیراوە"، واتا دەبێت سەرجەم وەزارەتەکان پابەندبن بە بەرزنەکردنەوەی داواکاری درێژکردنەوەی ماوەی یاسایی تەمەنی خانەنشینی بۆ ئەنجوومەنی وەزیران.

زانیاریی زیاتر: بەهۆی حوکمی ماددەی 13 لە یاسای ژمارە 26ـی 2019، درێژکردنەوەی ڕاژەی فەرمانبەر لەکاتی تەواوکردنی تەمەنی یاسایی هەڵوەشاوەتەوە. ئەمەش نەک تەنیا لە هەرێمی کوردستان، بەڵکو لە عێراقیش ڕاگیراوە.