شاندی ئیمرالی: بۆچوونەکانی سەرۆک بارزانی بۆ پرسی ئاشتی بە گرنگ و پێویست دەزانین

ئاڤا نیوز

ئەندامێکی شاندی ئیمرالی بۆچوون و تێبینییەکانی سەرۆک بارزانی لەبارەی پرسی ئاشتی بە گرنگ و پێویست دەزانێت، پەیامی ئۆجەلانیان بۆ هێناوە، پەیامی ئەویش بۆ ئۆجەلان دەبەنەوە.

چیرۆکی سەرەکی: شاندی ئیمرالی ئێستا لە هەولێرن و بڕیارە سبەی لەگەڵ سەرۆک بارزانی کۆببنەوە و پەیامی ئۆجەلانی لەبارەی پرۆسەی ئاشتی پێبگەیێنن.

لێدوانی فەرمی: محەممەد کەماچ، پەرلەمانتاری دەم پارتی و ئەندامی شاندی ئیمرالی بە ئاڤای وت:"  سەبەی کاتژمێر 10:00ی بەیانی لەگەڵ سەرۆک مەسعود بارزانی کۆدەبینەوە و دوای کۆبوونەوەکە کۆنگرەی ڕۆژنامەوانیمان دەبێت". 

وەک محەممەد کەماچ باسی کرد، لەسەر پێشنیازی عەبدوڵڵا ئۆجەلان سەردانی سەرۆک بارزانی دەکەن، ڕاو بۆچوونەکانی بارزانی بۆ پرسی ئاشتی بە گرنگ و پێویست دەزانن، دواتر پەیامی بارزانی بۆ ئۆجەلان دەبەنەوە. 

زانیاریی زیاتر: شاندەکە بۆ ماوەی دوو رۆژ لە هەولێر دەبن، دوای کۆبوونەوەی سبەی یەکشەممە، ڕۆژی دووشەمە کە نێچیرڤان بارزانی لە ئەڵمانیا گەڕایەوە، لەگەڵ ئەویش کۆبوونەوەیان دەبێت، دواتریش لەگەڵ سەرۆکوەزیران مەسرور بارزانی کۆدەبنەوە. ڕۆژی سێشەممەش سەردانی سلێمانی دەکەن و لەگەڵ بەرپرسانی باڵای یەکێتی کۆدەبنەوە.

لەلایەکی دیکەوە: چاوەڕوان دەکرا ئەمڕۆ ئۆجەلان بانگەوازێکی مێژوویی بڵاوبکاتەوە کە کاریگەری لەسەر چارەنووسی ناوچەکە دروست بکات و  دۆخی گرژی و ململانێکانی تورکیا بەرەو قۆناغی ئاشتی بگۆڕێت، بەڵام وەک ئەوەی چاوەڕی دەکرا بڵاو نەکرایەوە.

 

لەمبارەیەوە پەروین بووڵدان، ئەندامی شاندەکە بە ئاڤای ڕاگەیاند، بەهۆی تەواونەبوونی ئامادەکارییەکان پەیامەکە بڵاونکەراوەتەوە، بەڵام لەم مانگەدا هەر بڵاودەکرێتەوە.