هەولێر کۆبوونەوەیەکی دیکە لەبارەی پرسی کورد لە ئامێز دەگرێت

ئاڤا نیوز

 

هەرێمی کوردستان لە پرۆسەی ئاشتی لە توركیا ڕۆڵی خۆی دەگێڕێت و لەمبارەیەشەوە شاندی ئیمرالی سەردانی سەرۆک بارزانی دەکەن.

 

وێنە گەورەکە: دوای دەستپێشخەرییەکانی سەرۆک بارزانی، لەسەر پرسی کورد لە ڕۆژئاوای کوردستان و کۆبوونەوەی لەگەڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) و شاندی ئەنەکەسە لە هەولێر، بڕیارە ئەمڕۆ یەکشەممە شاندی ئیمرالی سەردانی سەرۆک بارزانی بکەن و پەیامێکی ئۆجەلانی لەبارەی پرۆسەی ئاشتی لە تورکیا پێ بگەیێنن.

 

لێدوانی فەرمی: محەممەد کەماچ، پەرلەمانتاری دەم پارتی و ئەندامی شاندی ئیمڕالی بە ئاڤا میدیای ڕاگەیاند: لەسەر پێشنیازی عەبدوڵڵا ئۆجەلان، هاتووین سەردانی سەرۆک مەسعود بارزانی بکەین، ڕاوبۆچوونەکانی لەسەر پرۆسەی ئاشتی بە گرنگ و پێویست دەزانین، هاوکات پەیامی سەرۆک بارزانی بە عەبدوڵڵا ئۆجەلان دەگەیێنینەوە.

 

زانیاریی زیاتر: شاندەکەی ئیمرالی دوو رۆژ لە هەولێر دەبن، وا بڕیارە لەگەڵ نێچیرڤان بارزانی، سەرۆکی هەرێمی کوردستان و سەرۆکوەزیران مەسرور بارزانی کۆببنەوە.

 

باکگراوند: دەوڵەت باخچەلی، سەرۆکی پارتی نەتەوەیی تورکیا (مەهەپە) ڕۆژی 22-10-2024، داوای کرد گۆشەگیریی سەر ئۆجەلان هەڵبگیرێت و ڕێگە بدرێت لە پەرلەمانی تورکیا پەیامێک پێشکەش بکات، دوو ڕۆژ دواتر ئۆجەلان لە پەیامێکدا ڕایگەیاند: دەسەڵاتم هەیە ململانێ و تووندوتیژییەکان بۆ زەمینەی یاسایی و سیاسی بگوازمەوە.

 

ئەمەش بزانە: ماوەی 26 ساڵە عەبدوڵڵا ئۆجەلان، ڕێبەری پارتی کرێکارانی کوردستان(پەکەکە)، لە زیندانی ئیمرالییە و هێزیکی 700 کەسی تایبەتی تورکیا چاودێری دوورگەکە دەکەن. 

 

بۆچی گرنگە: هەرێمی کوردستان وەک ژمارەیەکی قورس لە ناوچەکەدا سەیردەکرێت و وڵاتانی جیهانیش پشتیوانی و پشتگیریی خۆیانی بۆ دووپات دەکەنەوە، بەمەش هەولێر دەتوانێت ڕۆڵێکی گرنگ و بەرچاو لە پرسی کورددا بگێڕێت.