بە گوژمەی 90 ملیار دینار دەست بە درووستكردنەوەی ڕێگای شەقڵاوە - هەریر دەکرێت

 

ئاڤا نیوز

كارەكانی درووستكردنەوەی ڕێگای سەرەكی نێوان شەقڵاوە و هەریر دەستی پێكردەوە، كە هاتووچۆی نێوان پارێزگای هەولێر و ئیدارەی سۆران ئاسانتر دەكات.

وێنە گەورەكە: لەچوارچێوەی بایەخدانی كابینەی نۆیەمی حكومەتی هەرێمی كوردستان بە سێكتەری ڕێگاوبان، بە گوژمەی 90 ملیار دینار دەستكرا بە تەواوكردنی پڕۆژەی ڕێگەی شەقڵاوە - هەریر كە ماوەی دوو ساڵ بۆ تەواوكردنی پڕۆژەكە دیاریكراوە و لە لایەن وەزارەتی ئاوەدانکردنەوە و نیشتەجێكردن و بەڕێوەبەرایەتیی ڕێگاوبانی هەولێرەوە سەرپەرشتی دەکرێت.

لێدوانی فەرمی: هەڵگورد وەلی حوسێن، بەڕێوەبەری پڕۆژەكە ڕایگەیاند، سەرجەمی ڕێگاكە بە دەستی كاری ناوخۆ دروست دەكرێت و درێژییەكەی 10 كیلۆمەترە، دوو ئۆڤەرپاس لەخۆدەگرێت؛ یەكێكیان لە ناوچەی پیشەسازیی شەقڵاوە بۆ ئاسانكاری پێچكردنەوەی ئەوانەی مەبەستیانە بچنە ناوچەی پیشەسازیی شەقڵاوە، ئۆڤەرپاسی دووەمیش لەپێش تونێلی میراوە دەبێت بۆ ئەو گوندانەی لەسەر ڕێگاكەن، هاوكات نۆژەنكردنەوە و ڕووناككردنەوەی هەردوو تونێلی ماوەران و میراوە لەخۆدەگرێت.

بۆچی گرنگە: ڕێگاکە لەلایەک هەرێمی کوردستان و ئێران بە یەکەوە دەبەستێتەوە، لە لایەکی تریش ئیدارەی سەربەخۆی سۆران و پارێزگای هەولێر بەیەکەوە دەبەستێتەوە كە دەبێتە ئاسانكاری زیاتر بۆ جووڵەی بازرگانی و گەشتیاری، هاوكات بە تەواوبوونی ڕێگاکەش، جەنجاڵی لە شارۆچکەی شەقڵاوە کەم دەبێتەوە.