کۆمسیاری پەنابەران بۆ ئاڤا نیوز؛ نابێت پەنار و ئاوارەکان بە زۆرەملێ بنێردرێنەوە

ئاڤا نیوز

کۆمسیاری باڵای نەتەوە یەکگرتووەکان بۆ کاروباری پەنابەران، بە ئاماژەکردن بەوەی هەرێمی کوردستان شوێنێکی ئارامە بۆ ئاوارە و پەنابەران، جەخت دەکاتەوە نابێت بە زۆرەملێ بنێردرێنەوە.

چیرۆکی سەرەکی: دوای چەندین ساڵ تێپەڕبوون بەسەر شەڕی داعش، تاوەکو ئێستا زیاتر لە 300 هەزار پەنابەری سووری و 300 هەزار ئاوارەی عێراق لە هەرێمی کوردستانن، حکومەتی عێراقیش بڕیاری دەرکردووە تاوەکو ناوەڕاستی ئەمساڵ ئاوارەکان بگەڕێنرێنەوە و سەرجەم کەمپەکان دابخرێن.

لێدوانی فەرمی: دەبێت پەنابەر و ئاوارەکان خۆیان بڕیار بدەن بگەڕێنەوە زێدی خۆیان یان لە هەرێمی کوردستان دەمێننەوە، نابێت هیچ لایەنێک زۆرییان لێبکات، بڕیاری زۆرەملێ دروست و تەندروست نییە. جان نیکۆلا بۆس، نوێنەری ڕێکخراوی کۆمسیاری باڵای نەتەوە یەکگرتووەکان بۆ کاروباری پەنابەران وای ئاڤا نیوزی گوت.

زانیاریی زیاتر: نیکۆلاس بۆس ئاماژەی بۆ ئەوە کرد لەگەڵ هەردوو حکومەتی عێراق و هەرێمی کوردستان گفتوگۆیان کردووە چی پێویست بێت بۆ ئاوارەکان بکرێت، ئەوانیش تێگەیشتنی باشیان هەیە.

باکگراوند: 24 کەمپی ئاوارەکانی عێراق لە هەرێمی کوردستان هەیە، بەپێی دوایین ئامار نزیکەی 35 بۆ 37 هەزار خێزان لێیان نیشتەجێن و خەرجی ساڵانەیان زیاتر لە 800 ملیۆن دۆلارە .