لە دوو مانگدا نزیكەی 10 تۆن ماددەی هۆشبەر دەستی بەسەردا گیراوە

ئاڤا نیوز

گوتەبێژی وەزارەتی ناوخۆی عێراق ئاشکرایکرد، نزیکەی 10 تۆن ماددەی هۆشبەر و کارتێکەرە دەروونییەکان لە عێراق دەستی بەسەردا گیراوە، 121 تۆڕی بازرگانیکردن بە ماددەی هۆشبەر هەڵوەشێنراونەتەوە.

بۆچی گرنگە: لە ماوی دوو مانگدا نزیکەی دوو هەزار کەس بە تۆمەتی بازرگانی کردن بە ماددەی هۆشبەر دەستگیرکراون و 13 تۆڕی نێودەوڵەتی ماددەی هۆشبەر هەڵوەشێنراونەتەوە.

لێدوانی فەرمی: میقداد میری، گوتەبیژی وەزارەتی ناوخۆی عێراق لە کۆنگرەیەکی رۆژنامەوانیدا گوتی: "هەزار و 459 کەس دەستگیرکراون، 768  کەس سزا دراون، لە نێویاندا نۆ سزای لە سێدارەدان و 16 کەس سزای زیندانی هەتایی."

زانیاریی زیاتر: لەماوەی ئەو دوو مانگەدا 125 پارچە چەک، 143 ماتۆڕسکیل، 121 تۆڕی بازرگانیکردن بە ماددەی هۆشبەر هەڵوەشێنراونەتەوە کە 13 تۆڕیان نێودەوڵەتی بوون.

ئەمەش بزانە: بەگوێرەی بەدواداچوونێکی دەستەی سەربەخۆی مافی مرۆڤی عێراق، کریستاڵ و حەپی کەپتاگۆن زۆرترین بەکارهێنەری لەعێراق هەیە، کە لەوڵاتانی دراوسێ و بەنمرە یەک لە سووریاوە دەهێنرێتە نێو عێراق، حەشیش و هیرۆین دوو جۆری دیکەن کە بەکارهێنەریان لەعێراق زۆرە.