دڵشاد شەهاب: لەگەڵ یەکێتی باسی پۆستمان نەکردووە بەڵام لێک نزیکین

ئاڤا نیوز

 

شاندی دانووستانکاری پارتی و یەکێتی بۆ یەکلاکردنەوەی پشک و پۆستەکانی کابینەی نوێی حکومەتی هەرێمی کوردستان کۆدەبنەوە، ئەندامێکی شاندی دانووستانکاری پارتیش دەڵێت، یەکلاییکردنەوەی پۆستە باڵاکان بە کۆبوونەوەیەک و دوو کۆبوونەوە تەواو نابێت بەڵام نزیکبوونەوەی باش هەیە.

 

وێنە گەورەکە: دوای پێنج کۆبوونەوەی لیژنەی تەکنیکی پارتی و یەکێتی و ئامادەکردنی ڕەشنووسێک لەسەر دەسەڵاتی پۆستە باڵاکان و پەیکەربەندی حکومەت، بڕیارە لە لەچەند ڕۆژی داهاتوودا شاندی دانووستانکاری پارتی و یەکێتی، سێهەمین کۆبوونەوەی خۆیان بۆ گفتوگۆکانی پێکهێنانی حکومەت بکەن، بەپێی زانیارییەکانی ئاڤا میدیا، نزیکبوونەوەی زۆر لەنێوان هەردوو حیزبەکە دروست بووە و ئێستا هەوڵەکان بۆ ئەوەن، پێش جەژنی نەورۆز لەسەر پێکهێنانی کابینەی دەیەم بگەنە ڕێککەوتنی کۆتایی.

 

لێدوانی فەرمی: دڵشاد شەهاب، ئەندامی شاندی دانووستاندنکاری پارتی لەوەڵامی پرسیاری عوبەید بەشار، پەیامنێری ئاڤا ڕایگەیاند، "مەرج نییە بە کۆبوونەوەیەک و دووان حکومەت پێکبهێنرێت، بەڵام لێکنزیکبوونەوەی باش لە نێوانماندا هەیە."

 

پەیامنێری ئاڤا ئەوەشی لێپرسیوە، ئایا ڕاستە یەکێتی داوای وەزیری ناوخۆی کردووە، لە وەڵامدا دڵشاد شەهاب دەڵێت، "تاوەکو ئێستا باسی هیچ پۆستێک نەکراوە."

 

باکگراوند: شاندی دانوستاندنکاری پارتی و یەکێتیی تاوەکو ئێستا دوو کۆبوونەوەیان لەسەر ئاستی باڵا لە پیرمام و دەباشان کردووە، لیژنەی تەکنیکی نێوانیشیان پێنج کۆبوونەوەیان کردووە، چاوەڕێشدەکرێت لەم کۆبوونەوە چاوەڕوانکراوەدا بچنە وردەکاری گفتوگۆکانی دابەشکاری پشک و پۆستەکان.