مامۆستایانی خاوەن پێداویستی تایبەت لە چەمچەماڵ بەشێکی مووچەکەیان بڕاوە

ئاڤا نیوز

مامۆستایانی خاوەنپێداویستی تایبەت لە چەمچەماڵ بەشێکی مووچەکانیان بڕاوە و وەزیری پەروەردەش دەڵێ، هەوڵی چارەسەرکردنی کێشەکە دەکەین.

وێنە گەورەکە: بەدیجیتاڵیکردنی لیستی مووچە و خەرجییەکان هەندێ گرفتی بۆ دامەزراوەکانی حکومەت دروستکردووە، بەو هۆیەوە بەشێک لە مووچەخۆران مووچەی مانگی یەکیان بەتەواوەتی وەرنەگرتووە، لەڕێگەی ئاڤاوە داوا دەکەن هۆکاری کەمکردنەوەی مووچەکانیان بزانن.

لێدوانی فەرمی: مەحموود قادر، لەبەشی ژمێریاری پەروەردەی چەمچەماڵ دەڵێ،

- سێ هەزار مووچەخۆر لە سنووری پەروەردەی چەمچەماڵ مووچە وەردەگرن، پێشووتر ئامادەکردنی لیست سیستەمەکەی لەلای پەروردەی گشتیی سلێمانی بوو، "ئەم مانگە بەبێ ئاگادارکردنەوە داوایان کرد کە خۆمان لیستەکە ئامادە بکەین، دواتر یەکسەر داوایان کرد بۆیان بنێرین، بۆیە فریا نەکەوتین هەمووی جیا بکەینەوە".

- ئەو خاوەن پێداویستییانە نزیکەی 10 مامۆستا دەبن، پێشووتر هەموو مانگێک ناوی ئەوانمان بەجیا دەنارد، بەڵام لە پەروەردەی گشتیی سلێمانی داخل نەکرابوو، بۆیە لە لیستی مانگی یەک نەنووسراوە و ئێستاش هەموو دەرماڵەیەک وەستاوە، لەگەڵ کردنەوەی دەرگا بەڕووی خەرجکردنی ئەو دەرماڵانە ئەو کێشەیە چارەسەر دەکرێت، ئەو بڕەی مانگانە لەو مامۆستایانەش بڕاوە هەموویان بۆ خەرج دەکرێت.


لەلایەکی دیکەوە: د. ئالان حەمە سەعید، وەزیری پەروەردەی حکومەتی هەرێمی کوردستان ڕایگەیاند: بەدواداچوون بۆ ئەم بابەتە دەکەین و لەهەر کوێیەک مامۆستایان کێشەیان هەبێت هەوڵی چارەسەری دەدەین.