وەزارەتی پێشمەرگە: پیلانێكی تیرۆریستانی داعشمان پووچەڵ كردەوە

ئاڤا نیوز

وەزارەتی پێشمەرگەی حكومەتی هەرێمی كوردستان، لە ڕاگەیێنراوێكدا ئاشكرای دەكات، ئەمڕۆ لە سنووری دوزخورماتوو پیلانێكی چەكدارانی ڕێكخراوی تیرۆریستیی داعشیان پووچەڵ کردووەتەوە.

ڕاگەیێنراوی فەرمی: وەزارەتی پێشمەرگە ڕایگەیاند:

- بەرەبەیانی ئەمڕۆ چوارشەممە، شانەیەکی نووستووی گرووپی تیرۆریستی داعش لە سنووری گوندەکانی دوزخورماتوو، بە دیاریکراوی لە دەوروبەری گوندی دوراجی و غەررە، لە کردەوەیەکی ترسنۆکانەدا پەلاماری چەند شوانکارێکیان دا، لە ئەنجامدا ڕووبەرووبوونەوە لە نێوانیان دروستبووە.

- دوای ئاگادارکردنەوەی هێزی پێشمەرگە لەو سنوورە، دەست بەجێ هێزێکی پێشمەرگە بەمەبەستی بە هاناوەچوونی شوانەکان و خەڵکی ناوچەکە ڕوویان لە شوێنی رووبەڕووبوونەوەکە کرد و توانرا شوانەکان بە سەلامەتی بگەڕێندرێنەوە بۆ ناوچەکانی خۆیان و تیرۆرستەکانیش بۆ شوێنی نادیار هەڵهاتن.

لەلایەكی دیكەوە: ئەم ڕاگەیێنراوەی وەزارەتی پێشمەرگە لەكاتێكدایە كە پێشنیوەڕۆی ئەمڕۆ ئاڤا میدیا لە سەرچاوەیەک لە هێزی پێشمەرگە لە سنووری نێوان دووزخورماتوو و کفری بڵاوی كردەوە كە لە گوندی دوراجی ناوچەی داوێ، سێ شوانکار لەلایەن ژمارەیەک چەکداری داعشەوە گەمارۆ دراون، شوانکارەکان خۆیان چەکیان پێبووە و بەرگرییان کردووە، داوای هاوکارییشیان لە هێزەکانی پێشمەرگە کردووە، هێزێکی لیواکانی 9 و 32ـی پێشمەرگە لەو ناوچەیە کە بۆشایی ئەمنیی لەنێوان پێشمەرگە و سوپای عێراقدا هەیە، بەهانای شوانکارەکانەوە چوون و هەرسێ شوانکارەکە ڕزگارکراون، چەکدارەکانیش هەڵاتوون.