لە هەولێر بەردی بناغەی پڕۆژەیەكی گرنگی ئاوی خواردنەوە دادەنرێت

ئاڤا نیوز

لەڕێوڕەسمێكدا لە شاری هەولێر، بەردی بناغەی پڕۆژەی دانان و دابەشكردنی تۆڕی ئاوی ناوخۆ لە هێڵە لاوەكییەكان بە هێڵە سەرەكییەكانی پڕۆژەی خێرای گەیاندنی ئاوی هەولێر دانرا.

چیرۆكی سەرەكی: پڕۆژەكە بریتییە لە تێكەڵكردنی بۆریی سەرەكیی پڕۆژەی خێرای گەیاندنی ئاوی هەولێر بە بۆرییە لاوەكییەكانی گەڕەكەكانی شار بۆ ئەوەی لە هیچ گەڕەك و شوێنێكی شاری هەولێر گرفتی كەمئاوی نەمێنێت، بەپێی گوتەی سەرپەرشتیارانی پرۆژەكە تاوەكو ناوەڕاستی ئەمساڵ ئاوی پرۆژەكە بە نیوەی گەڕەكەكانی شاری هەولێر دەگات و گرفتی كەمئاوییان نامێنێت و تاوەكو كۆتایی ئەمساڵیش پرۆژەكە كۆتایی دێت.

زانیاریی زیاتر: پڕۆژەی دانان و دابەشكردنی تۆڕی ئاوی ناوخۆ لە هێڵە لاوەكییەكان بە هێڵە سەرەكییەكانی پڕۆژەی خێرای گەیاندنی ئاوی هەولێر ماوەی یەك ساڵ دەخایێنێت و تێچووی پڕۆژەكەش 25 ملیار دینارە و لەلایەن كۆمپانیای كەی وەن جێبەجێ دەكرێت.

لێدوانی فەرمی: ساسان عەونی، وەزیری شارەوانیی حكومەتی هەرێمی كوردستان ڕایگەیاند: لەسەر فەرمانی سەرۆکوەزیران مەسرور بارزانی بەردی بناغەی ئەو پرۆژەیە دادەنێین بۆ ئەوەی ئەو ئاوەی كە دەگەیێنرێتە شاری هەولێر، بگاتە ماڵان.

لەلایەكی دیكەوە: ئومێد خۆشناو، پارێزگاری هەولێر ڕایگەیاند: ئەگەر ئیرادە و دیدگەی سەرۆكوەزیران مەسرور بارزانی نەبووایە لەو دۆخەی كە ئێستا لە هەرێمی كوردستان هەیە لەڕووی ئابوورییەوە، نەدەتواندرا ئەو بڕیارە گرنگە بدرێت ئەویش هەنگاونانە بۆ چارەسەركردنی گرفتی كەمئاویی دانیشتووانی هەولێر.