دامەزراوەی دارایی نێودەوڵەتی ستایشی هەمەچەشنكردنی ئابووریی كوردستان دەكات

ئاڤا نیوز

 

سەرۆكوەزیران بارزانی لە كۆبوونەوەی لەگەڵ دامەزراوەی دارایی نێودەوڵەتی، میكانیزمی پێشخستنی گەشەپێدانی ئابووریی هەرێمی كوردستان تاوتوێ دەكات.

چیرۆكی سەرەكی: ئێوارەی ئەمڕۆ 20-2-2025، سەرۆكوەزیران مەسرور بارزانی پێشوازیی لە شاندێكی دامەزراوەی دارایی نێودەوڵەتی كرد، لە دیدارێكدا گفتوگۆ لەبارەی پەرەپێدانی هاریكاری و هەماهەنگی نێوان هەردوولا كرا لەپێناو برەودان بە وەبەرهێنانی ناوخۆیی و بیانی و سوودوەرگرتن لە ڕێنماییەكانی دامەزراوەكە لەبواری گەشەپێدانی ئابووری.

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان بڵاوی كردووەتەوە، سەرۆكوەزیران سوپاسی دامەزراوەی دارایی نێودەوڵەتی کرد بۆ پشتیوانیی و هاریکاری و هاوئاهەنگییان لەگەڵ لایەنە پەیوەندیدارەکانی حکومەتی هەرێمی کوردستان، لەپێناو پێشخستنی وەبەرهێنانی ناوخۆیی و ڕەخساندنی دەرفەتی وەبەرهێنان بۆ وەبەرهێنەرانی بیانی.

بابەتە ستراتیژییەكە: لە دیدارەكەدا، گفتوگۆ لەبارەی ئەنجامەکانی جێبەجێکردنی ئەو ڕێککەوتنامەیە کرا کە لە نێوان دامەزراوەی دارایی نێودەوڵەتی و دەستەی وەبەرهێنانی حکومەتی هەرێمی کوردستان واژۆ کراوە، بۆ دروستکردنی ناوچەی پیشەسازی.

لەلایەكی دیكەوە: شاندەکە ستایشی بەرنامەی چاکسازی حکومەتی هەرێمی کوردستانی کرد لە بواری هەمەچەشنکردنی ئابووری و گرنگیدان بە کەرتە جۆراوجۆرەكانی کشتوکاڵ و پیشەسازی و بانکی و وزە.