عەلی عەلاق: کردنەوەی لقێکی بانکی ناوەندیی لە سلێمانی هەنگاوێكی گرنگە

ئاڤا نیوز

لە میانی بەشداریکردنی لە ڕێوڕەسمی کردنەوەی ناوەندیی نێودەوڵەتیی بۆ دارایی و بازرگانی لە سلێمانی، پارێزگاری بانکی ناوەندی عێراق ئاشکرای کرد، کۆبوونەوەکان بۆ کردنەوەی لقێکی فەرمی بانکی ناوەندی لە هەرێمی کوردستان بەردەوامە.

چیرۆکی سەرەکی: ئەمرۆ پێنجشەممە 20-2-2025، لە رێوڕەسمێکدا ناوەندیی نێودەوڵەتیی بۆ دارایی و بازرگانی لە سلێمانی کرایەوە، ناوەندەکە پێکهاتووە لە کۆمەڵێک بانکی ناوخۆیی و نێودەوڵەتیی، کۆمپانیای ئاڵوگۆڕی دراو، کۆمپانیای تایبەت بە فرۆشتنی پشک، سەنتەری لێکۆڵینەوەی ئابووری، سەنتەرێکی ڕاهێنان و سەنتەری زیرەکی دەستکرد.

لێدوانی فەرمی: عەلی عەلاق، پارێزگاری بانکی ناوەندیی عێراق ڕایگەیاند: 

- كردنەوەی ئەم ناوەندە هەنگاوێكی گرنگە بۆ ڕێکخستنی کاروباری بانکەکان و کۆمپانیای ئاڵوگۆڕی دراو و وەبەرهێنەران، لەئەنجامدا  سوودێکی باش دەگەیێنێت بە ئابووری عێراق.

- پارێزگای سلێمانی، یەکێکە لەو پارێزگایانەی کە زۆرترین بانک و کۆمپانیای ئاڵوگۆڕی دراو و دامەزراوەی دارایی تێدایە، بۆیە بوونی بانکی ناوەندی گرنگە بۆ ڕێکخستنی کارەکانی ئەو بانک و سەنتەرانە.

- بۆ کردنەوەی لقێکی فەرمی بانکی ناوەندی لە هەرێمی کوردستان، توانیومانە بەشێک لە کێشە و ئالنگارییەکانی بەردەم ئەم بابەتە چارەسەر بکەین، بۆ چارەسەرکردنی کێشەکانی دیکەش بەردەوامین لە گفتوگۆکردن لەگەڵ حکومەتی هەرێمی کوردستان.