وەزیری شارەوانی: 240 هەزار فەرمانبەر فەرمانی پێدانی زەوییان بۆ دەرچووە

ئاڤا نیوز

ساسان عەونی، وەزیری شارەوانی و گەشتوگوزاری حكومەتی هەرێمی كوردستان سەبارەت بە بەردەوامیی پرۆسەی دابەشكردنی زەوی بەسەر فەرمانبەران دڵنیایی دەدات و دەڵێ پرۆسەكە زۆر بە باشی بەڕێوەدەچێت و بەردەوامە.

لێدوانی فەرمی: ساسان عەونی، وەزیری شارەوانیی حكومەتی هەرێمی كوردستان ڕایگەیاند: 

- پرۆسەی دابەشكردنی زەوی بەسەر فەرمانبەران زۆر بە باشی بەڕێوەدەچێت و بەردەوامە، تاوەكو ئێستا زیاتر لە 240 هەزار فەرمانبەر لە سەرتاسەری هەرێمی كوردستان فەرمانی پێدانی زەوییان بۆ دەرچووە.

- هەوڵی ئێمە بۆ ئەوەیە، هەموو ئەو فەرمانبەرانەی كە بڕیارەكە دەیانگرێتەوە زەوییان پێبدرێت.

- چەند وەزارەتێك گرفتی تەكنیكییان هەبووە، لیژنە تایبەتمەندەكانمان سەرقاڵی چارەسەركردنی گرفتەكانن و پرۆسەكە فەرمانبەرانی سەرجەم وەزارەتەكانی بێ جیاوازی دەگرێتەوە.

باكگراوند: ڕۆژی 27ـی ئازاری 2024، سەرۆکوەزیران مەسرور بارزانی، کۆمەڵێک بڕیای لە بەرژەوەندی هاووڵاتیان و فەرمانبەران دا، یەکێکیان تایبەت بوو بە دابەشکردنی زەوی بەسەر فەرمانبەران، ئێستاش پرۆسەكە بەردەوامە و بە ڕێكوپێكی بەڕێوە دەچێت.