وەزیری شارەوانی: زەوییەكانتان هەرزانفرۆش نەكەن

ئاڤا نیوز

وەزیری شارەوانی و گەشتوگوزار دووپاتی دەكاتەوە، سەرجەم ئەو زەوییانەی بە فەرمانبەران دەدرێن لە شوێنی باش و گونجاون و هیوادارە فەرمانبەران زەوییەكانیان هەرزانفرۆش نەكەن.

چیرۆكی سەرەكی: پرۆسەی پێدانی زەوی بە فەرمانبەران بەردەوامە و بەگوتەی ساسان عەونی، وەزیری شارەوانی و گەشتوگوزاری هەرێمی كوردستان، تاوەکو ئێستا فەرمانی دابەشكردنی زەوی بۆ 240 هەزار و 111 فەرمانبەر لە سەرجەم وەزارەت و دەزگا نەبەستراوەكان بە وەزارەتەكان دەرچووە.

چی ڕوودەدات: ئێستا سەرۆكایەتییەكانی شارەوانیی لە شار و ناوچەكان سەرقاڵی ئامادەكردنی زەوین بۆ ئەو بابەتە و هێشتا میكانیزمێكی دیاریكراو ڕانەگەیێنراوە بۆ ئەوەی زەوییەكان چۆن بەسەر ئەو فەرمانبەرانە دابەش بكرێت كە ڕەزامەندییان بۆ دەرچووە.

لێدوانی فەرمی: ساسان عەونی، وەزیری شارەوانی و گەشتوگوزاری لە لێدوانێكی ڕۆژنامەوانی ڕایگەیاند، ئێستا ناوی 35 هەزار فەرمانبەری دیکە بۆ وەرگرتنی زەوی ئامادەیە و لەسەرەتای هەفتەی داهاتوودا بەرز دەکرێتەوە بۆ ئەنجوومەنی وەزیران.

ئەوەی پێویستە بیزانیت: پێچەوانەی ئەو دەنگۆیانەی كە گوایە ئەو زەوییانەی بەسەر فەرمانبەران دابەش دەكرێن لە شوێنی خراپن و نەگونجاون، وەزارەتی شارەوانی و گەشتوگوزار دڵنیایی دەدات لەوەی شوێنی زەوییەكان زۆرباش و گونجاوە و ڕێگەش نادەن هیچ کێشەیەک ببێتە بەربەست لە بەردەم ڕاگرتنی پرۆسەی دابەشکردنی زەوی.