لە دهۆك تیمێكی ئیتاڵی 10 نەشتەرگەریی دەگمەن بۆ منداڵان ئەنجام دەدەن

ئاڤا نیوز

لە پارێزگای دهۆك، تیمێكی پزیشكانی ئیتاڵی ژمارەیەك نەشتەرگەریی دەگمەن بە سەركەوتوویی ئەنجامدەدەن بۆ ئەو منداڵانەی دووچاری نەخۆشی دڵ هاتوون.

وێنە گەورەكە: بەپێی یاداشتێكی واژۆكراو لەنێوان بەڕێوەبەری گشتیی تەندروستیی پارێزگای دهۆك و ڕێكخراوی (SIA)ـی ئیتاڵی و بەهاوكاری ڕێكخراوی هێڤی بۆ بایەخدان بە تەندروستیی منداڵان، تیمی پزیشكانی ئیتاڵی كە لە باشترین نەخۆشخانەكانی ئیتاڵیاوە هاتوون، نەشتەرگەریی دەگمەن بۆ ئەو منداڵانە ئەنجامدەدەن كە دووچاری نەخۆشی دڵ هاتوون و تاوەکو ئێستاش دەیان نەشتەرگەریی سەركەوتوویان لەناوخۆی هەرێمی كوردستان ئەنجامداوە.

ڕاگەیێنراوی فەرمی: بەپێی ڕاگەیێنراوی بەڕێوەبەرایەتی تەندروستیی دهۆك، تیمی پزیشكانی ئیتاڵی لەنێو سەنتەری نەشتەرگەری و نەخۆشییەكانی دڵ، توانیویانە 10 نەشتەرگەریی سەركەوتوو بۆ منداڵانی نەخۆشی دڵ ئەنجامبدەن كە بەشێكیان هەر لە زگماكییەوە دووچاری لاوازی دڵ ببوون.

زانیاریی زیاتر: لەچوارچێوەی ئەو یاداشتەی لەنێوان تەندروستیی دهۆك و ڕێكخراوە ئیتاڵییەكە واژۆكراوە، تیمی پزیشكانی ئیتاڵی پێشتر چەندین جار سەردانی پارێزگای دهۆكیان كردووە و نەشتەرگەریی هاوشێوەیان بۆ منداڵان ئەنجامداوە، هاوكات ئەو نەخۆشانەی چارەسەركردنییان لە نەخۆشخانەكانی هەرێمی كوردستان ئەستەمە، ڕەوانەی نەخۆشخانەكانی ئیتاڵیا دەكرێن.