یەكێک لە کۆنترین پەرستگەکانی عێراق تاوەکو ئێستا فەرامۆشکراوە

ئاڤا نیوز

 

یەكێک لە پەرستگە دێرینەکانی عێراق کە بە ناوی شاری دێرینی ئور ناوزەند دەکرێت، زیاتر لە هەزار ساڵ پێش ئێستا پایتەختی شانشینی سۆمەرییەکان بووە، بەڵام ئەو ناوچەیە بێ خزمەتگوزاری جێهڵدراوە و هیچ کارێکی گرنگ بۆ پاراستنی نەکراوە. 

 

چیرۆکی سەرەکی: یەکێک لە کۆنترین پەرستگەکانی عێراق دەکەوێتە ڕۆژئاوای شاری ناسڕیە، دیارترین سیمای ئەو پەرستگایە بوونی زەقوورەیەکە کە لەلایەن پاشایی سۆمەرییەکان ئور نمو، بنیاتنراوە بۆ پاراستنی خواوەندی مانگ و تاوەکو ئێستا ماوەتەوە.

 

لێدوانی فەرمی: عەلی نەشمی، توێژەری زانستی لە بواری شوێنەوار ڕایگەیاند، ئەو پەرستگا دێرینەی ئێستا ماوەتەوە، لەسەردەمی بابلییەکاندا وەک دادگا بەکارهێنراوە و دوای ئەوەی چەندین گۆڕانکاری بیناسازی تێداکراوە. 

 

زانیاریی زیاتر: بڕیاربوو دوای سەردانەکەی پاپا فرانسیس بۆ ئەو ناوچەیە لە ئاداری 2021دا، چەندین پڕۆژەی گەشتیاری و ئاینی گرنگ لەو ناوچەیەدا جێبەجێ بکرێت تاوەکو سەرنجی گەشتیاران بۆ ئەو ناوچەیە ڕابکێشرێت، بەڵام هەموو بەڵێنەکان تەنها لە چوارچێوەی قسەدا مانەوە.