سەرۆكی لیژنەی فەتوا: مامەڵەكردن بەدراوی پای و هاوشێوەکانی حەرامە

 

ئاڤا نیوز

ماوەیەکە مامەڵەکردن بە دراوی ئەلیکترۆنی لەناو هاووڵاتییان زیادبووە، چەندین جۆری دراو لە هەرێمی کوردستان و عێراق مامەڵەی پێدەکرێت، بەڵام لەلایەن بەشێک لە مامۆستایانی ئاینی ئیسلامەوە پەسند ناکرێت.

چیرۆکی سەرەکی: دراوی ئەلیکترۆنی پای لە ڕێگەی ئەپلیکەیشنی مۆبایل و ئینتەرنێت هاووڵاتییان بەشداری دەکەن و مامەڵەی پێوەدەکەن، لەسەر ئاستی جیهان زیاتر لە 60 ملیۆن بەکارهێنەری هەیە، لە کوردستان و عێراقیش بەکارهێنەری زۆرە، بە گوێرەی لێدوانی لیژنەی فەتوای سلێمانی، مامەڵەکردن بە دراوی پای و هاوشێوەکانی حەرامە.

لێدوانی فەرمی: دکتۆر محەممەد پێنجوێنی، سەرۆكی لیژنەی فەتوای سلێمانی، بە ئاڤا میدیای ڕاگەیاند، هەر دراوێكی ئەلیكترۆنی پاڵپشتی یاسایی لەلایەن حكومەت نەبوو  مامەڵەكردن پێیەوە دروست نییە، بۆیە مامەڵەكردن بەدراوی پای و هاوشێوەكانی وەك مامەڵەكردنە بە خۆڵ و ئاینی ئیسلام بە دروستی نازانێت.

زانیاریی زیاتر: دکتۆر محەمەد پێنجوێنی، دەڵێت، ڕووی قسەکانم تەنها لەسەر دراوی پای نیە بەڵكو هەر دراوێك، ئاینی ئیسلام پێمان دەڵێت دەبێت شتێك بێت بنەمای هەبێت و ڕاستی هەبێت و دراوەكە پشتگیریەكی یاسایی هەبێت و داوای پارەی كاش بكەیت بتوانیت پارەی كاش وەربگریت یان بیگۆریت، بە پێچەوانەوە مامەڵەكردن پێیەوە لە ئاینی ئیسلام حەرامە و ڕێگەپێدراو نیە، چونکە ئاینی ئیسلام پێمان دەڵێت لەگەڵ وەهم مامەڵە مەكەن، لەڕووی مەزهەبی شافعی مامەڵەكردن بە شتێك بنەمای نەبوو حەرامە.

 

ئەوەی پێویستە بیزانیت: پای دراوێكی ئەلیكترۆنییە بەشێوەیەكی سەربەخۆ و بەبێ هیچ تێچوویەك، دوای ئەوەی دراوەكە لیست كرا و كەوتە بۆرسەی دراوە ئەلیكترۆنییەكانەوە، خەڵكێكی زۆر لە هەرێمی كوردستان ئێستا كڕین و فرۆشتنی پێوە دەكەن.