ئێران هەڕەشەی نوێ دەکات و هۆشداری بە کوردستان و عێراق دەدات

ئاڤا  نیوز

 

نزیک دەبێتەوە لە دوو ساڵ، عێراق و ئێران ڕێککەوتنی ئەمنییان واژۆ کردووە، بەڵام بەگوێرەی زانیارییە ڕۆژنامەوانییەکان، ئێران لەم ماوەیەدا هۆشداری داوەتە عێراق لە ئەگەری جێبەجێنەکردنی سەرجەم خاڵەکانی ناو ڕێککەوتننامە ئەمنییەکەی نێوانیان، هێرشی مووشەکی و ئاسمانی دەکاتە سەر تەواوی بارەگای هێزە ئۆپۆزیسیۆنە کوردییەکانی نیشتەجێی هەرێمی کوردستان.

 

زانیاریی بەدەستهاتوو: میدیا عێراقییەکان بڵاویان کردووەتەوە، ئێران ئەنجامدانی کۆنگرەی حزبی دیموکراتی کوردستانی ئێران لە خاکی هەرێمی کوردستان کە لە چەند هەفتەی ڕابردوو کرا، بە پێشێلی ڕێککەوتنی عێراق و ئێران دەبینێت.

 

لێدوانی فەرمی: محەممەد نەزیف قادری، بەرپرسی دەزگای گشتی پەیوەندییەکانی حزبی دیموکرات، بە ئاڤا میدیا ڕاگەیاند: ئێران ساڵانە بەردەوام هەڕەشە دەکات، ئێمەش لە سۆشیال میدیا گوێمان لەو هەڕەشانە بووە، نە حکومەتی هەرێمی کوردستان و نە حکومەتی عێراق هیچ ئاگادارییەکیان پێ نەداوین لەو بارەیەوە، لەگەڵ ئەوەشدا ئێران هیچ بیانوویەکی نییە بۆ پەلاماردانی ئێمە.

زانیاریی زیاتر: ڕۆژی 19ـی ئاداری 2023، عەلی شەمخانی سکرتێری ئەوکاتی ئەنجوومەنی ئاسایشی نیشتمانیی ئێران و قاسم ئەعرەجی راوێژکاری ئاسایشی نیشتمانیی عێراق، کۆنووسێکی ئەمنیی هاوبەشیان واژۆ كرد، كه‌ تایبه‌ت بوو به‌ هه‌ماهه‌نگی لەڕووی پاراستنی سنووری نێوان هەردوو وڵات.

 

لەلایەکی دیکەوە: دواتر بەهۆی جێبەجێکردنی ڕێککەوتنامەی ئەمنیی نێوان ئێران و عێراقەوە، ‎77بارەگای پارته‌ کوردییەکانی ئۆپۆزیسیۆنی ئێران لە سنوورەکان داخراون و بارەگاکانیشیان ڕادەستی فەرماندەیی پاسەوانی سنوور کران، هەروەها ئەندامانیشیان بۆ شەش کەمپ گواستراونه‌ته‌وه‌، چوار کەمپ لە هەولێر و دوو کەمپ لە سلێمانی.

 

ئەوەی پێویستە بیزانیت: سەرەتای ئەم مانگە حیزبی دیموکراتی کوردستانی ئێران بەناوی (کۆنگرەی یەکگرتنەوەی دیموکراتەکان)ـە، حڤدەهەمین کۆنگرەی خۆی بەست، ئەم کۆنگرەیە لەژێر فشارێکی زۆری  ئێران جیاواز بوو و زیاتر بە شێوازی ئۆنڵاین کرا، چونکە بەگوێرەی ڕێککەوتننامە ئەمنییەکەیە، هێزە ئۆپۆزسیۆنەکانی ئێران نابێت هیچ چالاکییەکیان لە خاکی عێراق و هەرێمی کوردستان هەبێت.