كاروانێكی دیكەی سەربازیی هاوپەیمانی نێودەوڵەتیی دەگاتە ڕۆژئاوای كوردستان

ئاڤا نیوز

 

ڕوانگەی سووری بۆ مافەكانی مرۆڤ ڕایدەگەیەنێت، كاروانێكی دیكە سەربازیی هێزەكانی هاوپەیمانی نێودەوڵەتیی گەیشتە حەسەکە لە ڕۆژئاوای كوردستان.

 

وێنە گەورەكە: دوای سەرهەڵدانی داعش و هەڵكشانی گرژییەكانی سووریا، ئەمریكا و هاوپەیمانی نێودەوڵەتیی ژمارەیەک بنكە و بارەگای سەربازییان لە ڕۆژئاوای كوردستان و ناوچەكانی باكووری ڕۆژهەڵات و ناوچە سنوورییەكانی سووریا كردەوە كە جگە لە چەک و كەرەستەی سەربازی، هەزاران سەربازی لەخۆگرتووە. 

 

ڕاگەیێنراوی فەرمی: ڕوانگەی سووری بۆ مافەكانی مرۆڤ لە ڕاگەیەندراوێكدا بڵاویكردۆتەوە، کاروانێکی نوێی سەربازیی هێزەکانی هاوپەیمانی نێودەوڵەتیی، گەیشتنە بنکەی قەسرەک لە ناوچەی وەزیری لە دەشتاییەكانی پارێزگای حەسەکە لە ڕۆژئاوای كوردستان.

 

زانیاریی زیاتر: كاروانەكەی هاوپەیمانان لە هەرێمی كوردستانەوە چووتە خاكی سووریا لەڕێگەی دەروازەی سنووریی ئەلوەلید كە پێكهاتووە لە: 36 بارهەڵگر لە سندووقی داخراو، ساردکەرەوە، چەک و تەقەمەنی، سندوقی بەندکردن، تانکی سووتەمەنی و زرێپۆش، ئەوەش لەچوارچێوەی بەهێزکردنی  بنکە و پێگە سەربازیەکانی هاوپەیمانان لە ناوچەكە.

 

پەیوەست بەم بابەتە: سێ ڕۆژ لەمەوبەر لە 19-2-2025، دوو فرۆكەی بارهەڵگری سەربازیی هێزەكانی هاوپەیمانان لە بنكەی كێڵگەی نەوتی عومەر لە دەشتاییەكانی دێرەزۆر نیشتووەتەوە كە گەورەترین بنكەی سەربازیی هاوپەیمانانە لە سووریا، بەگوێرەی زانیارییەكان ئەو دوو فڕۆكەیە، كەرەستەی سەربازی و لۆجستی بۆ بنكە سەربازییەكان لە ناوچەكانی باكووری ڕۆژهەڵاتی سووریا گواستووەتەوە.