عێراق داوای ڕادەستكردنەوەی گیراوانی نێو گرتووخانەكانی كوردستان دەكات

ئاڤا نیوز

 

حكومەتی عێراق داوای ڕادەستكردنەوەی ئەو بەندكراو و حكومدراوە عێراقیانە دەكات كە لە دادگاكانی هەرێمی كوردستان سزایان بەسەردا سەپێنراوە و لەنێو بەندیخانەكانی هەرێمی كوردستان گیراون.

 

وێنە گەورەكە: شاندێكی ئەمنیی عێراق بە سەرۆكایەتی قاسم ئەعرەجی، ڕاوێژكاری ئاسایشی نەتەوەیی عێراق بۆ تاوتوێكردنی پرسی ڕادەستكردنەوەی حكومدراوە عێراقییەكانی نێو گرتووخانەكان و پاراستنی ئەمنییەتی سنوورەكان و پرسە ئەمنییە هاوبەشەكان، سەردانی هەرێمی كوردستانیان كرد و لەلایەن ڕێبەر ئەحمەد، وەزیری ناوخۆی هەرێمی كوردستان لە دیوانی وەزارەتی ناوخۆ پێشوازییان لێكرا.

 

ڕاگەیێنراوی فەرمی: بەپێی ڕاگەیێنراوی وەزارەتی ناوخۆی هەرێمی كوردستان، لە كۆبوونەوەكەدا گفتوگۆ لەبارەی رێككەوتنی ئەمنی نێوان عێراق و ئێران کراوە، هاوکات پرسی ئەو بەندكراوانەیان تاوتوێ کردووە  كە لە هەرێمی كوردستان سزایان بەسەردا سەپێنراوە و لەلایەن حكوومەتی فیدراڵییەوە داواكراون.

 

زانیاریی زیاتر: هەردوولا هاوڕابوون لەسەر ئەوەی كێشەی ئەم گیراوانە بەشێوەیەكی یاسایی و نەریتی دادوەری و بەپێی یاسا كارپێكراوەكانی عێراق مامەڵەیان لەگەڵدا بكرێت و چارەسەرییان بۆ بدۆزرێتەوە.

 

ئەوەش بزانە: هەر لەو كۆبوونەوەیە، جەخت لە هەماهەنگی و كاری هاوبەش لەنێوان حكومەتی هەرێمی كوردستان و حكومەتی فیدراڵی و كۆماری ئیسلامی ئێران كرایەوە بە مەبەستی زیاتر پاراستنی ئاسایش و سەقامگیریی سنوورەكان.