مەشهەدانی بۆ ڕێگری لە بەزۆر کۆچپێکردنی خەڵکی غەززە چەند پێشنیازێک دەخاتەڕوو

 

ئاڤا نیوز

سەرۆکی پەرلەمانی عێراق پێشنیاز دەکات بۆ ڕووبەڕووبوونەوەی پێشنیازەکەی ئەمریکا و ئیسرائیل بۆ بەزۆر کۆچپێکردنی خەڵکی غەززە، پەرلەمانی وڵاتانی عەرەبی بەیاسا ئەو پێشنیازە ڕەتبکەنەوە و سندوقێکی وەبەرهێنانی ئیسلامیش بۆ ئاوەدانکردنەوەی کەرتەکە پێکبهێنن.

چیرۆکی سەرەکی: بەر لە کۆبوونەوەی لوتکەی عەرەبی لە سەرەتای مانگی داهاتوودا، ئەمڕۆ کۆبوونەوەی سەرۆک پەرلەمانەکانی وڵاتانی عەرەبی لە میسر بەڕێوەچوو و تێیدا پلانی گواستنەوەی خەڵکی غەززە بۆ دەرەوەی کەرتەکە ڕەتکرایەوە.

لێدوانی فەرمی: مەحموود مەشهەدانی، سەرۆکی پەرلەمانی عێراق لە وتارێکدا و پەیوەست بە دۆخی فەڵەستین، پێشنیازییکرد:

٠ پەرلەمانی وڵاتانی عەرەبی یاسایەکی یەکگرتوو دەربکەن و گواستنەوەی خەڵکی غەززە بۆ ئوردن و فەڵەستین و هەر ناوچەیەکی دیکە ڕەتبکەنەوە، هاوکات ئەو کۆمپانیایانەش بخرێنە لیستی سزاکانەوە کە لە بۆردومانکردنی غەززەدا هاوکاری ئیسرائیل بوون.

٠ پەرلەمانی وڵاتانی عەرەبی ئاساییکردنەوەی پەیوەندی لەگەڵ ئیسرائیل بەتاوان بناسێنن تا ئەو کاتەی دەوڵەتی فەڵەستین دروستدەکرێت.

٠ هاوردەکردنی کاڵای فەڵەستینی بۆ وڵاتانی عەرەبی لە باج و گومرگ ببەخشرێن بۆ پشتیوانی دەستی کاری ئەو وڵاتە، هاوکات ڕاستەوخۆ پشتیوانی ئابووری ناوخۆیی غەززە و کەناری ڕۆژئاوا بکرێت

٠ هاوکاریی زیاتر پێشکەش بە تیمی نەتەوە یەکگرتووەکان لە غەززە بکرێت و پەرلەمانی وڵاتانی عەرەبی بە یاسا بودجەی زیاتر بۆ فەڵەستین دابین بکات، هاوکات سندوقێکی عەرەبی و ئیسلامی بۆ وەبەرهێنان فەڵەستین دروستبکرێت.