سیروان بارزانی بۆ ئاڤا: ڕاگرتنی خزمەتگوزاریی ئینتەرنێتی کۆڕەک کوردستان ناگرێتەوە

ئاڤا نیوز

بەڕێوەبەری بۆردی کۆمپانیای کۆڕەک تیلیکۆم ڕایگەیاند، بڕیاری دەستەی ڕاگەیاندن و پەیوەندییەکانی عێراق بۆ ڕاگرتنی خزمەتگوزاریی ئینتەرنێت لەسەر هاوبەشی هێڵی کۆڕەک، تەنیا پارێزگاکانی ژێر دەسەڵاتی حکومەتی فیدراڵ دەگرێتەوە، جەختیشی کردەوە کە هەموو خزمەتگوزارییەکانی کۆڕەک لە پارێزگاکانی هەرێمی کوردستان ئاسایین و گرفتیان نییە.

ئەوەی پێویستە بیزانیت: بەهۆی کەڵەکەبوونی قەرزەکانی و بە بڕیاری دەستەی ڕاگەیاندن و پەیوەندییەکانی عێراق، لە 19ی ئەم مانگەوە خزمەتگوزاری ئینتەرنێت لەسەر ملیۆنان هاوبەشی کۆمپانیای کۆڕەک تیلیکۆم لە عێراق بڕدراوە.

لێدوانی فەرمی: سیروان بارزانی، بەڕێوەبەری بۆردی کۆمپانیای کۆڕەک تیلیکۆم بە ئاڤا میدیای ڕاگەیاند: بڕیاری ڕاگرتنی خزمەتگوزاریی ئینتەرنێت لەسەر هاوبەشانی هێڵی کۆڕەک لە پارێزگاکانی عێراق، پارێزگا و ئیدارە سەربەخۆکانی هەرێمی کوردستان ناگرێتەوە و لە هەرێمی کوردستان هەموو خزمەتگوزارییەکانی هێڵی کۆڕەک ئاسایین.

باکگراوند: 19ی ئەم مانگەش کۆمپانیای کۆڕەک تیلیکۆم، بڕیارەکەی دەستەی ڕاگەیاندن و پەیوەندییەکان و وەزارەتی پەیوەندییەکانی عێراقی بە پێشهاتێکی مەترسیدار ناوبرد و داوای کرد دەستوەردانی خێرا بکرێت بۆ ڕاگرتنی ئەو ڕێکارە ناڕەوایە کە هەڕەشەیە لەسەر داهاتووی پەیوەندییەکان لە عێراق، ئاشکراشیکرد "ئەم هەنگاوە کە گوشاری سیاسی پێوەدیارە و ئامانج لێی دوورخستنەوەی کۆمپانیاکەمانە بە قازانجی لایەنێکی دیکە. ئەوەش یەکەمجارە ستەمێکی لەمجۆرە لە خزمەتگوزاریی هاووڵاتیان لە عێراق و لەسەرتاسەری جیهاندا ڕوودەدات".