سۆسیالست و یەکگرتوو و کۆمەڵ دژ بە یەک قسە دەکەن

ئاڤا نیوز

چەند ڕۆژێكە گرژی كەوتووەتە نێوان محەممەدی حاجی مەحموود سەرۆكی پارتی سۆسیال دیموكراتی كوردستان و هەردوو حیزبی یەكگرتووی ئیسلامی و كۆمەڵی دادگەری و لەڕێگە و شوێنی جۆراوجۆرەوە پەیامی دژ بەیەك بڵاودەكەنەوە.

چیرۆکی سەرەکی: محەممەدی حاجی مەحموود لە دیدارێكی تەلەفزیۆنیدا ڕایگەیاند كە حیزبە ئیسلامییەكانی هەرێمی كوردستان مانگانە 150 دەفتەر لە حكومەت وەردەگرن، ئەم لێدوانە، بەرپرسانی یەكگرتووی ئیسلامی و كۆمەڵی دادگەری توڕە كرد و هەریەكە و لە شوێنی خۆیەوە بە توندی وەڵامیان دایەوە.

بۆچوونی لایەنی بەرامبەر:  سەڵاحەدین بابەكر، گوتەبێژی یەكگرتووی ئیسلامی ڕایگەیاند كە ئەو قسەیە تۆمەتە و تەشهیریشە و لەسەر ئەو قسەیە كاكە حەمە دەدەینە داگا.

محەممەد حەكیم گوتەبێژی كۆمەڵی دادگەرییش لە وەڵامی كاكە حەمەدا پەیامێكی بڵاوكردەوە و دەڵێت، ئەو بۆ ئەوە قسە دەكات تا خەڵك باسی بكات و پێوەی مەشغوڵ بن ئەوە ئێمە و ئەوە حكومەتی هەرێم  و كابینەی نۆ بزانن یەك فلسمان وەرگرتووە؟

لە لایەکی دیکەوە: فەرهاد تۆفیق، وتەبێژی پارتی سۆسیال دیموكراتی كوردستان بە یەك پەیام وەڵامی هەردوو حیزبەكە ئیسلامییەكەی داوەتەوە و دەڵێت ئاشکراکردن و وتنی چەند ڕاستییەکی شاراوە لەلایەن محەممەد حاجی مەحموودەوە بووەتە سەغڵەتبوونی هەندێک لایەن، کە ئەو بابەتانەیان لە هاووڵاتیان و ئەندام و دەنگدەرانی خۆیان شاردووەتەوە.

دەشڵێت، ئەگەر راست نییە و پارەكە وەرناگرن، فەرموو بەرپرسەکانتان سوێند بۆ ئەندامانی خۆتان بخۆن، کە بەهیچ شێوەیەک پارە لە حکومەت  وەرناگرن.