فایلی خەڵک؛ خانەنشینانی قوشتەپە داوای کردنەوەی پارکێک دەکەن بۆ کاتبەسەربردن

 

ئاڤا نیوز

خانەنشینانی قوشتەپە داوا دەکەن وەکو چۆن لە هەولێر پارکێکی تایبەت بە خانەنشینان هەیە، پارکێکیان بۆ درووست بکرێت.

چیرۆکی سەرەکی: دوای بڕیاری خانەنشینی یەکگرتوو، کە هاوتای عێراق کراوە،  ژمارەیەکی زۆر لە مامۆستا و فەرمانبەر خانەشین بوون، خانەنشینانی قوشتەپە داوای شوێنێکی تایبەت دەکەن بۆ بەسەربردنی کات و کۆبوونەوە لەگەڵ یەکتری. دەڵێن ناکرێت هەموو رۆژ لە قوشتەپەوە بچینە هەولێر، با پارکی خۆمان هەبێت.

لێدوانی فەرمی: بژار مەلا خدر، قایمقامی قوشتەپە بە ئاڤا میدیای ڕاگەیاند: داواکاری خانەنشینانمان گەیاندووە، ڕەزامەندی ملیارێک و 100 ملیۆنمان لە سەرۆکوەزیران مەسرور بارزانی وەرگرتووە، کە پارکی گشتیی قوشتەپە نۆژەن بکەینەوە و لەناو پارکەکەش شوێنێکی تایبەت بۆ خانەنشینان دروست دەکرێت و دابیندەکرێت.

قایمقامی قوشتەپە، دەڵێت، کارەکان تەواو بووە سەرقاڵی ئەوەین کارەکە بە کۆمپانیایەک بدەین دەست بە پرۆژەکە بکرێت.

لە لایەکی دیکەوە:  ئەو پارکەی هەولێر بۆ خانەنشینان درووستکراوە، لە ڕووی خزمەتگوزارییەوە بەرزە،  وەزیری تەندروستی، دکتۆر سامان بەرزنجی بە ئاڤای گوت، لەڕووی تەندروستیشەوە هەموو شتێکمان بۆ دابین کردوون داو و دەرمان و کادرو هەمووشتێک، ئەوانە ساڵانێکە خزمەتێکی زۆری ئێمەیان کردووە، حەقە ئێمەش خزمەتیان بکەین.