فایلی خەڵک؛ داواکارییەک لە ژمارەیەک پێشمەرگەی بریندارەوە لە هەڵەبجە

ئاڤا نیوز

لە هەڵەبجەی شەهیدەوە ژمارەیەك پێشمەرگە كە لە شەڕی دژ بە تیرۆریستانی داعش بریندار بوونە پەیوەندییان بە ئاڤا میدیا كرد، گلەییان هەیە و دەڵێن هەر ئێوە شك دەبەین بیگەیێنن.

چیرۆکی سەرەکی: پێشمەرگەیەک لە ناوچەی بەشیر لە شەڕێكی سەختی تیرۆریستانی داعش زامدار بووە، بەناوی سەرجەم پێشمەرگەكان قسەی بۆ ئاڤا كرد و ڕایگەیاند كە بە بڕیاری حكومەت بڕێك پارە دەدرا بە بریندارانی شەڕی داعش، نزیكەی 16 وەجبە پارەكەیان وەرگرت و كە گەیشتە سەرەی ئێمە وەستا. دەشڵێت ئێمە ژمارەمان سەدان پێشمەرگەیە و برینداری شەڕی داعشین تاوەكوو ئێستا هاوكارییەكەمان وەرنەگرتووە و چەند ساڵێكە مافمان خوراوە و هێشتا چاوەڕێین.

زانیاری بەدەستهاتوو: ئاڤا میدیا بەدواداچوونی وردی كرد و دەركەوت كە  بابەتەكە ڕاستە و زیاتر لە نیوەی پێشمەرگە بریندارەكان وەك هاوكاری ملیۆنێك تاوەكو دوو ملیۆن دیناریان پێدراوە، بەڵام چەند وەجبەیەك ماون تاوەكو ئێستا بێبەش بوونە.

لێدوانی فەرمی: بەرپرسێكی باڵای وەزارەتی پێشمەرگە كە پەیوەندیدارە بە بابەتەكەوە بە ئاڤا میدیای ڕاگەیاند: ئەو پێشمەرگە ئازیزانە دڵنیا دەكەینەوە كە بەهیچ شێوەیەك مافیان نافەوتێ و سەتا سەت ئەو هاوكارییەیان پێدەدرێت، بەڵام دابینكردنی پارەكە لە ئەستۆی وەزارەتی داراییە و بەهۆی قەیرانی داراییەوە چەند ساڵێكە پرۆسەكە وەستاوە.

گوتیشی، داوامان لە وەزارەتی دارایی كردووە بڕە پارەی پێویست بۆ ئەو پێشمەرگانەش دابین بكات بۆ ئەوەی بەسەریان دابەشی بكەین و چاوەڕێی وەڵامی ئەوانین، بەدڵنیاییەوە لە كات و دۆخی گونجاودا پارەكە دەنێرن و دابەشی دەكەین.