وەزارەتی خوێندنی باڵای هەرێمی کوردستان: کێشەی دانپێدانانی زانکۆ تایبەتەکان چارەسەر دەبێت

ئاڤا نیوز

 

لە بەرامبەر کشاندنەوەی دانپێدانان بە پێنج زانکۆی ئەهلی لە کەرکووک و مووسڵ، وەزارەتی خوێندنی باڵای عێراق بڕیاری دانپێدانانی بە زانکۆ ئەهلییەکانی هەرێمی کوردستان هەڵوەشاندووەتەوە، وەزارەتی خوێندنی باڵای هەرێمی کوردستانیش دەڵێت، لە هەوڵی چارەسەرکردنی کێشەکەداین.

 

نووسراوی فەرمی: وەزارەتی خوێندنی باڵا و توێژینەوەی زانستیی عێراق لە نووسراێکدا لە ڕۆژی 15-01-2025 دەریکردووە، تێیدا هاتووە، "بڕیاردرا دانپێدانان بە زانکۆ و کۆلێژە تایبەتەکانی هەرێمی کوردستان هەڵبوەشێتەوە، ئەوەش بە پاساوی ئەوەی وەزارەتی خوێندنی باڵای هەرێمی کوردستان دانپێدانی بە بەشێک لە زانکۆ تایبەتەکانی کەرکووک و موسڵ هەڵوەشاندووەتەوە.

 

زانیاریی زیاتر: لە نووسراوەکەدا ئەوەش هاتووە کە وەزارەتی خوێندنی باڵای هەرێمی کوردستان دان بە زانکۆ تایبەکانی عێراق بنێت، ئەگینا ئەو بڕیارەیان بەردەوام دەبێت و دان بە زانکۆ و کۆلێژە تایبەتەکانی هەرێمی کوردستان نانێن.

 

لێدوانی فەرمی: د. توانا نەجەف، سەرۆکی دیوانی وەزارەتی خوێندنی باڵا و توێژینەوەی زانستی هەرێمی کوردستان بە ئاڤای گوت، "هەنگاوی ئەرێنی بە ئاراستەی چارەسەری ئەم کێشەیە نراوە و لە گفتوگۆ و پەیوەندیداین لەگەڵیان بۆ کۆتاییهێنان بەو کێشەیە."

 

ئەوەی پێویستە بیزانیت: لە ماوەی ڕابردوو، وەزارەتی خوێندنی باڵای هەرێمی کوردستان بڕیاری دانپێدان بە زانکۆکانی؛ جەعفەری سادق، قەلەم، کیتاب، نور و حەدبا لە هەردوو پارێزگای نەینەوا و کەرکووک هەڵوەشاندەوە.