سوودانی پێشوازی لە پزیشکە عێراقییەکەی غەززە دەکات

ئاڤا نیوز

سەرۆکوەزیرانی عێراق پێشوازیی لەو پزیشکە عێراقییە کرد، کە بە درێژایی جەنگی کەرتی غەززە لەو کەرتە چارەسەری بریندارانی دەکرد.

چیرۆکی سەرەکی: محەممەد شیاع سوودانی، سەرۆکوەزیرانی عێراق لە بەغدا، پێشوازیی لە محەممەد تاهیر ئەبو ڕەغیف، پزیشکە عێراقییەکە کرد کە بە درێژایی جەنگ لە کەرتی غەززە  چارەسەری بریندارانی دەکرد، سوودانی خانوویەک و پاسپۆرتی دیپلۆماسیی بە دکتۆرەکەدا بەرامبەر کارە خۆبەخشییەکەی لە غەززە.

ڕاگەیێنراوی فەرمی: نووسینگەی ڕاگەیاندنی سەرۆکوەزیران ڕایگەیاند: سوودانی خانوویەکی لە ناوەڕاستی بەغدا و پاسپۆرتی دیپلۆماسی بەو پزیشکە دا، وەک پێزانینێك بۆ ئەو بەخشینە مرۆییە ئازایانەی. هاوکات سوودانی فەرمانیکرد بە دروستکردنی نەخۆشخانەیەک لە کەرتی غەززە.

لەلایەکی دیکەوە: دکتۆر ئەبو ڕەغیف پێزانینی خۆی بۆ گرنگیپێدانی سەرۆکوەزیران و هەموو هەوڵە فەرمی و جەماوەرییەکانی پشتیوانی غەززە و هەڵوێست و هەنگاوەکانی پێشوو دەربڕی.

ئەوەی پێویستە بیزانیت: محەممەد تاهیر، پزیشکێکی بەڕەگەز عێراقییە، لە ماوەی 7 مانگدا خۆبەخشانە زیاتر لە سەدان نەشتەرگەریی بۆ بریندارانی کەرتی غەززە کردووە، هاوکات چاودێریی تەندروستیی سەدانی دیکەشی کردووە.