شاسوار عەبدولواحید ستایشی هەڵوێستێکی محەممەدی حاجی مەحموود دەکات

ئاڤا نیوز

شاسوار عەبدولواحید، سەرۆكی جووڵانەوەی نەوەی نوێ و محەممەدی حاجی مەحموود، سەرۆكی پارتی سۆسیال دیموکراتی کوردستان لە گوڵەخانە كۆدەبنەوە، پرسی زوو هەڵبژاردنی دەستەی سەرۆكایەتی پەرلەمانی كوردستان و پێكهێنانی كابینەی دەیەمی حكومەت بابەتی گەرمی كۆبوونەوەكە بووە، ئاڤا زانیویەتی لەو دیدارەدا شاسوار عەبدولواحید ستایشی محەممەدی حاجی مەحموودی كردووە بۆ دواهەمین هەڵوێستی بەرامبەر بە حیزبە ئیسلامیەکان کە پارە لە پارتی و یەکێتی وەردەگرن و وەک دووڕوویی سیاسی وەسفی کردوون.

چیرۆکی سەرەکی: ئەمڕۆ یەکشەممە، لە گوڵەخانە محەممەدی حاجی مەحموود، سەرۆکی پارتی سۆسیال دیموکراتی کوردستان پێشوازیی لە شاسوار عەبدولواحید، سەرۆکی جوڵانەوەی نەوەی نوێ کردووە و گفتوگۆیان لەسەر چەندین بابەت کردووە.

ڕاگەیێنراوی فەرمی: بەپێی ڕاگەیێنراوی سەرۆكی پارتی سۆسیال دیموکراتی کوردستان، لەدیدارەکەدا، گفتوگۆ لەبارەی گۆڕانکارییەکانی هەرێمی کوردستان، عێراق و ناوچەکە و گوزەرانی هاووڵاتیانی هەرێمی کوردستان بەگشتی و مووچەخۆران بەتایبەتی، كراوە.

لێدوانی فەرمی: دكتۆر فەرهاد تۆفیق، وتەبێژی پارتی سۆسیال دیموکراتی کوردستان بە پەیامنێری ئاڤای ڕاگەیاندووە، شاسوار عەبدولواحید سوپاسی محەممەد حاجی مەحمودی کردووە بۆ ڕاستگۆیی و بوێری لە هەڵوێستە نەتەوەیی و سیاسیەکانیدا، بەتایبەت سەبارەت بە هەڵوێستی دواییان بەرامبەر بە حیزبە ئیسلامیەکان کە پارە لە پارتی و یەکێتی وەردەگرن و وەک دووڕوویی سیاسی وەسفی کردوون.

بابەتە ستراتیژییەكە: گرنگی زوو هەڵبژاردنی دەستەی سەرۆکایەتی پەرلەمان و پێکهێنانی کابینەی دەیەم لەپێناو دەربازكردنی هەرێمی كوردستان لەو بۆشاییە یاساییەی دروستبووە، بابەتی سەرەكی كۆبوونەوەكە بوو.