سبەی دەوامی ناوەندەکانی خوێندن لە چەند پارێزگایەکی عێراق ڕادەگیرێت

 

ئاڤا نیوز

بەهۆی دابەزینی پلەکانی گەرما و بۆ پاراستنی تەندروستیی قوتابیان، دەوامی ناوەندەکانی خوێندن لە چەند پارێزگایەکی عێراق بۆ سبەی دووشەممە ڕادەگیرێت.

چیرۆکی سەرەکی: دەستەی کەشناسی عێراق پێشبینی دەکات بەیانی لە کەرکووک و نەینەوا پلەکانی گەرما یەک پلەی ژێر سفری سەدی بێت، هاوکات لە پارێزگاکانی هەرێمی کوردستانیش لەنێوان 2 بۆ 4 پلەی ژێر سفری سەدی دەبێت، لە بەغدا و دیالە و سەڵاحەدینیش پلەکانی گەرما سفر پلەی سەدی دەبێت.

ڕاگەیێنراوی فەرمی: بەگوێرەی ڕاگەیێنراوێکی پارێزگای نەینەوا، بەهۆی دابەزینی پلەکانی گەرما، پارێزگاری نەینەوا بڕیاریدا سبەی دووشەممە دەوام لە ناوەندەکانی خوێندن لە پارێزگاکە ڕابگیرێت.

لەلایەکی دیکەوە: پارێزگاری سەلاحەددین بە پشتبەستن بەو ڕاپۆرتانەی لەلایەن بەڕێوەبەرایەتی کەشناسی لە پارێزگاکە دەرچووە، کە ئاماژە بۆ دابەزینی بەرچاو و نائاسایی پلەکانی گەرما دەکات. بۆ پاراستنی سەلامەتی قوتابیان بڕیاری ڕاگرتنی دەوامی فەرمی لە سەرجەم قوتابخانەکانی پارێزگاکە بۆ سبەینێ دووشەممە 24ـی شوباتی 2025 دەرکرد.

هاوکات بڕیاردرا دەوامی فەرمی کەمبکرێتەوە، بەو پێیەی دەوام لە سەرجەم فەرمانگەکانی حکومەت لە کاتژمێر نۆی بەیانی دەستپێدەکات لەبری هەشتی بەیانی.

هەر بەهۆی دابەزینی پلەکانی گەرما، لە پارێزگای موسەنناش لە ناوەندەکانی خوێندن کرایە پشوو.