عومەر فەقێ تا 27ـی مانگ لە زیندان دەبێت

ئاڤا نیوز

 

عومەر مەحموود فەقێ كە وەک چالاكوان لە تۆڕە كۆمەڵایەتییەكان ناسراوە لە دیدارێكی میدیاییدا نزای بۆ سەدام حوسێن، سەرۆكی پێشووتری عێراق كرد، لەسەر سکاڵای پارێزەرێکی هەولێر دەستگیر دەکرێت.

 

چیرۆکی سەرەکی: دوای ئەوەی لە دیدارێكی میدیاییدا نزای بۆ سەدام حوسێن، كاردانەوەی توندی خەڵک بە گشتی و كەسوكاری شەهیدان و ئەنفالكراوانی بەتایبەت لێكەوتەوە و لە هەولێر و گەرمیان سكاڵای یاسایی لەسەر تۆمار كرا، لەسەر سکاڵای پارێزەرێکی هەولێر لەلایەن پۆلیسی هەولێر دەستگیر دەکرێت، بەپێی بڕیاری دەستگیردنەکەشی بێت تا 27ـی ئەم مانگە لە زیندان دەبێت، دواتر دادگای دەکرێت، ئەگەر هیچ سکاڵایەکی دیکەی لەسەر نەبێت بە کەفالەت ئازاد دەکرێت.

 

لێدوانی فەرمی: شێخ محەممەد بارزانی، ئەو پارێزەرەی لە شاری هەولێر سکاڵای لەسەر عومەر فەقێ، تۆمار کردووە، بە ئاڤا میدیای ڕاگەیاند: دوای ئەوەی عومەر فەقێ نزای بۆ سەدام حسێن کرد، سکاڵام لەسەر تۆمار کرد، لەسەر سکاڵای ئێمە دەستگیر کرا، هاوکات سکاڵایەکی دیکەشم لەسەر جنێودان تۆمار کرد، کە لە گۆنگرەیەکی ڕۆژنامەوانی جنێو و قسەی ناشرینی کرد بوو.

 

زانیاریی زیاتر: ئەو پارێزەرە دەڵێت، بە پێی بڕیاری دەستگیرکردنەکەی تا 27ـی ئەم مانگە لە زیندان دەبێت، دواتر دادگایی دەکرێت، ئەگەر هیچ سکاڵایەکی دیکەی لەسەر نەبێت بە کەفالەت ئازاد دەکرێت، بەڵام بڕوا ناکەم ئازاد بکرێت، چونکە من سکاڵایەکی دیکەشم لەسەر جنێودان لەسەری تۆمار کرد بوو.

 

لەلایەکی دیکەوە: لەسەر سكاڵای ژمارەیەک ڕێكخراوی بواری جینۆساید،  لەلایەن دادگای كەلارەوە بڕیاری دەستگیركردنی بۆ دەرچوو بوو، لەسەر ئەم کەیسەش ڕێککاری یاسایی لەبەرامبەری ئەنجامدەدرێت، ئەمانە وادەکات ماوەیەکی درێژتر لە زیندان بمینێتەوە.