بەشێکی دانیشتوانی هەرێمی کوردستان لەسەر مووسڵ و کەرکووک هەژمارکراون

 

ئاڤا نیوز

وەزارەتی پلاندانانی هەرێمی كوردستان ئاشكرای كرد كە بەپێی ئەنجامەكانی سەرژمێریی گشتیی دانیشتووان، ژمارەی دانیشتووانی هەرێمی كوردستان 6 ملیۆن و 502 هەزار و 750 کەسە، بەڵام ئەم ژمارەیە بەبێ دانیشتووانی ئەو قەزا و ناحیانەیە  كە لەڕووی ئیدارییەوە سەر بە هەرێمی كوردستانن، بەڵام بۆ سەرژمێری لەگەڵ پارێزگاكانی مووسڵ و كەركووك هەژمار كراون.

وێنە گەورەکە: ئەمڕۆ دووشەممە 2025-02-24، وەزارەتی پلاندانانی عێراق دەرەئەنجامی سەرژمێریی دانیشتووانی ڕاگەیاند، بەگوێرەی دەرەئەنجامەکە ئێستا ژمارەی دانیشتووانی هەرێمی کوردستان 6 ملیۆن و نیو زیاترە.

لێدوانی فەرمی: دڵزار حەمەساڵح، بەڕێوەبەری ئاماری هەولێر بە ئاڤا میدیای ڕاگەیاند: ئێستا كار لەسەر سەرجەم ئەو ناوچانە دەكرێت كە لە سنووری ماددەی 140ـن، زیانیارییەكان جیادەكرێنەوە و بەراوردی داتاكانی هەریەك لە وەزارەتی ناوخۆ و كۆچ و كۆچبەران و پسووڵەی خۆراك و كارتی نیشتمانی و ئەنجامی سەرژمێریی ساڵی 1957 دەكرێن. بێگومان ئەو ناوچانە لەڕووی ئیدارییەوە سەر بە كوێ بن لەسەر ئەو پارێزگایە هەژمار دەكرێن، بەمەش ژمارەی دانیشتووانی هەرێمی كوردستان زیاتر دەبێت لەو ژمارەیەی ئێستا.