دانیشتووانی گەڕەکێکی کەرکووک ڕێگای هەولێر کەرکووک دادەخەن

 

ئاڤا نیوز

لە بەرامبەر ڕووخاندنی دووکان و ڕێگریکردن لە دروستکردنی خانوو لەسەر زەوییەکانیان، بەشێک لە هاووڵاتیانی گەڕەکی شۆراوی کەرکووک لە گردبوونەوەیەکی ناڕەزایەتیدا بۆ ماوەی چەند خولەکێک ڕێگای سەرەکی کەرکووک- هەولێرییان داخست، دواتریش لەلایەن هێزە ئەمنییەکانەوە کۆتایی بە گردبوونەوەکەیان هێنرا.

چیرۆکی سەرەکی: لە ماوەی رابردوودا لە کەرتی 5 و 6ـی گەڕەکی شۆراوی کەرکووک کە سەرجەم دانیشتووانانی کەرتەکە کوردن، لیژنەکانی لابردنی زێدەڕۆیی لە قایمقامییەتی ناوەندی کەرکووک سێ دووکانی نووسینگەی خانووبەرە دەڕووخێنن، ڕێگریش لەو خاوەن زەوییانە دەکەن کە دەیانەوێت لەو کەرتە خانوو لەسەر زەوییەکانییان دروست بکەن.

قووڵتر: ئەم کێشەیە چەند ڕەهەندێکی جیاوازی هەیە و کێشەکە قوڵ و دورودرێژە، بەشێکیان کڕیویانە، بەشێکیان وەریان گرتووە، بەشێکیان خۆیان تەختیان کردوون و بوونەتە خاوەنی.

لێدوانی فەرمی: بە وتەی بەشێک لەو خاوەن زەوییانە، یەکێک لە گۆشەکانی کێشەکە ئەوەیە، مەکتەبی سیاسی یەکێتیی نیشتمانیی کوردستان لەو پارێزگایە هۆکارێکی ئەم ڕێگرییانەیە، چونکە پێشتر بەشێک لەو زەویانە لەلایەن ئەوانەوە دابەش کراون، حکومەتی خۆجێی پارێزگاکەش دەڵێت مافیاگەرایی هەیە، دروستکردنی خانووەکان زێدەڕۆییە و قبوڵی ناکەن و دەیڕووخێنن.

زانیاریی زیاتر: دانیشتووانی ئەو کەرتەی گەڕەکی شۆراو داواکارن ڕێگەیان پێبدرێت لەسەر ئەو زەوییانەی کە بە پارەی خۆیان کڕیویانە، خانوو دروست بکەن و قەرەبووی ئەو خاوەن دووکانانەش بکرێتەوە کە لەلایەن لیژنەکانی قایمقامییەتەوە دووکانەکانیان ڕووخێنراون.